Radio, online – Iha forsa armadas marka tan istoria hodi halao mudansa, Major General Taur Matan Ruak halao serimonia despedida ho forsa F-FDTL iha sentru instruksaun Metinaro, Nicolao Lobato. Iha despedida ne’e General Taur hakoak malu ho forsa sira ho sentimentu emosional hodi hasai matan ben.
Liu husi diskursu ne’ebe halao Kinta, (29/9), Major General Taur Matan Ruak hateten katak, ohin, oportunidade ikus liu mak hau mai hasoru malu ho imi, depois hau servisu hamutuk ho imi iha tinan 36 resin, ba servi ita nia nasaun no ita nia povu. Ohin, hau mai atu komprementa imi no despida imi.
“Ita nia instituisaun forsa armadas F-FDTL iha istoria tempo pasadu, ho nia naran. Istoria FALINTIL ne’ebe liga ho tempo pasadu, ho nia naran. Istoria FALINTIL ne’ebe liga ho ita nia povu ita nia povu no ita nia nasaun nian, iha tinan 36 nia laran,” dehan Taur.
Durante ita nia moris, hanesan instituisaun ita halo konkista bo’ot iha ita nia vida. Ita kontribui ba Independensia nasaun Timor nian, hodi lakon ita nia soldadu rihun ba rihun iha kombate. Husik hela faluk, oan kiak sira no liman tohar-ain tohar namkari iha Timor Lorosa’e laran tomak.
FALINTIL nia kontribuisaun halao konkista ida mak liga ho nasaun ne’e ninia independensia hanesan nasaun soberanu hodi hamrik iha komunidade Internasional nia oin.
Konkista ida mak FALINTIL halao transformasaun husi forsa Gerila ba forsa konvensional ne’ebe modernu ho proforesional ne’ebe diak no kapas liu, hetan kredibilidade iha mundu.
“Iha mundu ne’e, ejesisiu la barak mak konsede ida ne’e. Ita Timor konsege, ita nia forsa armadas konsege halo ida ne’e,” dehan Taur.
Taur sadik ho lian nakdoko katak, laiha buat ida defisil iha vida nudar forsa, see karik hakarak atu lao ba oin. Istoria FALINTIL hatudu ba povu katak, kusta to’o iha ne’ebe deit, terus to’o iha ne’ebe deit, forsa armadas la hakfodak.
“Ita nia moris ba trava batalha, no manan batalha iha ita nia vida, maibe dezafiu mai iha oin seri maka’as liutan no bo’ot liu. Tanba ne’e presiza haburas nafatin forsa ne’e nia matenek, vontade no deterrminasaunm atu lao ba oin,”Taur afirma.
Taur mos afirma katak, laiha forsa ida iha mundu simu premiu Nobel da paz, premeiru ne’ebe hetan husi Prezidenti da Republika Jose Ramos Horta entrega hela ba FALINTIL. Ne’e onra ho previlejiu ba instituisaun F-FDTL.
Iha ikus liu Major General fitun rua nebe ‘e atu ba vida sivil ne’e husu ba forsa foun sira atu banati tuir dalan ne’ebe FALINTIL kria dadaun hela ne’e. Nune’e mos Taur husu ba Veteranus sira mak sei ejisti iha F-FDTL atu akompanha nafatin forsa foun hanesan alin no oan sai hanesan moris familia iha uma laran.
“Hau husik hela imi ba iha komando ida ne’ebe lao hamutuk ho hau iha tinan naruk no sei lori forsa ne’e ba dalan diak no ba povu nia diak. Hau husik hela imi, maibe hau nia fuan sorin hau hela ho imi wainhira hau iha ne’ebe deit,”Taur apela.
Discussion about this post