Radio, online – “Salsinha hau nia kompaneiru, ami nain rua terus hotu ba nasaun ida ne’e fakar no hikis ami nia kosar hisik ami nia ran. Ami iha komprimisu ida atu transforma Timor tuir mehi ne’ebe Timor oan hotu iha,” dehan Taur hodi responde ba eis Tanente Gastao Salsinha ba Taur Matan Ruak merese sai Prezidenti da Republika 2012.
Major General Taur Matan Ruak kasu lia hirak ne’e ba jornalista Kinta, (29/9) iha seromonia emosional despedida ho forsa armada F-FDTL iha sentru instruksaun Metinaro.
Eis Tanente Gastao Salsinha hanesan lider ba petisionairu sira ne’ebe mak halo revolta instituisaun F-FDTL iha 2006. Ho konsekuensia ne’e, Gastao ho nia grupo petisionairu tenki ba vida sivil tuir desizaun estadu nian.
Tuir Taur maske Salsinha ho grupo petisionariu sira sai vida sivil, maibe relasaun nudar ema patriotizmu ba nasaun ne’e metin nafatin.
General ho fitun rua ne’e hatutan, “Hau fo agradese ba Salsinha no agradese ba Timor oan hothotu, ne’ebe depozita hau ho konfiansa bo’ot. I hau hatudu iha tinan 30 resin, katak hau iha mehi ida deit fo an ba Timor no fo an ba povu Timor. Ne’e hau nia ambisaun uniku. Uluk, agora no aban-bairua,”nia komenta.
Husu ba Taur Matan Ruak, konaba PSD nia Sekertariu Geral dehan Major General komesa besik ba PSD hodi apoia ba iha kandidatura ba Prezidenti da Republika. Tuar responde katak, konaba asuntu ne’e iha dia 6 de Outobru mak sei koalia sai ba publiku konaba desizaun ba vida sivil.
Alende ne’e mos Taur sei fo sai ba ekipa susesu ne’ebe agora ne’e lao dadaun hodi buka apoiantes 50.000 votus hodi bele rejistu iha CNE hanesan kandidatura.
Antes ne’e Gastao Salsinha dehan katak, ho rezignasaun Major General Taur Matan Ruak ba vida sivil hanesan dalan positivu no Taur merese duni iha 2012 sai prezidenti da Republika iha nasaun ne’e no ba povu ida ne’e.
Tuir Salsinha katak, Taur ema ida ne’ebe neutru, maske problemas barak mak mosu iha instituisaun F-FDTL iha pasadu.
Discussion about this post