Xefi Suku Eleitu Bairu Pite Joanina Sei Tau Prioridade Programa Neen ba nia Komunidade

DILI,28-11-2023_Xefi suku Bairo Pite, Joanina Alves Soares hatete, programa prioridade neen sei implementa iha durante mandatu tinan hitu nia laran.

Uluk liu hatoo agradese ba aman maromak nomos herois ne’ebé foo aan ba rai doben Timor-Leste bele selebra loron independensia ba dala 48.

Iha momentu nee simu ona knaar liuhusi tomada de posse ho responsabilidade boot para bele implementa programa iha suku Bairo-Pite.

“Iha programa neen mak suku bairo pite iha,” Sefi suku Bairo Pite, Joanina Alves Soares, informa ba jornalista hafoin remata serimonia tomada de posse iha AMD Kaikoli, Tersa ne’e (28/11/2023).

Nia esplika, programa primeiru mak hakbesik atendimentu ba komunidade, hakbiit konhesimentu foinsae no ema ho defisiensia iha edukasaun laos formal, hametin pas no unidade, aldeia saudavel, aktividade desportu no transferensia ezekusaun.

Programa prioridade neen nee hakarak servisu hamutuk konselho suku iha Bairo-Pite ba mandatu tinan 7 nian.

Hanesan lideransa feto ida senti orgullu no kongratula ba IX Govenu konstitusionál liuliu mensajen husi Prezidente da Repúblika, Jose Ramos Horta katak, tempu too ona feto mos bele lidera no involve iha politika.

“Ho ida nee hau hanesan sefi suku eleitu hamrik reprezenta munisipiu Dili atu enkorajan maluk sira katak iha futuru ita hotu bele kompete iha kualket posizaun liuliu dezenvolve pais ida nee,” nia hakotu.

Iha fatin hanesan, sefi suku re-eleitu suku Kamea, Matos da Costa, afirma, agradese ba komunidade iha suku Kamea ne’ebé foo nafatin votus konfiansa bele lidera fali suku Kamae ba periodu tinan hitu tan.

“Ami iha esperansa katak ba oin ami sei esforsu para rezolve problema sira ne’ebé iha suku laran liuliu bee moos no estrada,” dehan Matos

Tanba programa prioridade iha suku kamea mak bee moos no estrada durante seidauk rezolve ho problema hirak ne’ebe komunidade sira infrenta iha tinan kotuk ne’e sei rezolve iha mandatu tinan hitu nia laran.

Tanba nee husu ba governu hare programa prioridade sira nee, durante nee rekomenda nafatin liuhusi proposta atu nunee IX governu bele rezolve problema sira nee.

Nia informa, suku kamea iha aldeia rua ailele leten no ailele hun mak komunidade infrenta problema bee moos ho estrada. Maibe aldeia sira selu mos infrenta hotu.

Portantu, total populasaun iha aldeia rua nee hamutuk 217 seidauk asesu bee moos ne’ebé kanaliza husi governu.

Entratantu, suku kamea lokaliza iha postu administrativu kristu rei ho total aldeia 13 ho populasaun 19 mill.

Jornalista: Natalia Araujo