Vqq(Bibileo) – Joven mak autór ba mudansa, liafuan ida ne’e dalabarak temin, maibé menus asaun, ita haree iha joven balun esforsu hodi halo mudansa ba ninia moris maibe Joven balun sei kria problema, se joven halo konflitu iha suku laran tanba sa, menus empregu ka menus motivasaun.
Iha ne’e ita sei ba akompanha reprezentante foinsae sira nia lian no esperansa ba sira nia lideransa foun Suku Bibileo, Postu Viqueque Vila, Munisipiu Viqueque.
Rozantina Rangel hanesan joven feto husi Bibileo nudar mós manorin informa lideransa suku foun presiza rona aspirasaun no preokupasaun komunidade nian no servisu hamutuk ho konsselu suku no komunidade hodi hatur lolos identidade suku Bibileo liuhusi kultura.
Joven Rozantina Rangel
“Komunidade Bibileo moris iha ambiente ne’ebe hakmatek, fasilita dalan atu komunidade moris iha dezenvolvimentu, no joven sira unidade hamutuk ba dezenvolve suku no moris iha kultura” dehan Rozantina
Foinsae Mario Rangel husu ba lideransa foun atu envolve joven sira iha atividade desportivu no atividade sira hanesan dezenvolve turizmu no hakiak animal hodi hamenus konflitu.
“kria amizade liu husi mundu desportivu ne’ebé iha, atu Jovem sira bele partisipa ho sira-nia talentu ida idak. No dezenvolve potensia turismo istoriku, no bele hakiak mos animal sira seluk tuir possibilidade ne’ebé iha”
Foto Onofria dos Anjos
Onofria Maria dos Anjos mos hatoo nia esperansa katak ba lideransa foun suku Bibileo tenki halibur komunidade hotu, no tau importansia mós ba komunidade nia moris.
“Hakuak komunidade hotu, no labele tau proridade ba ita nia an deit, halibur joven sira moris ho unidade atu nune labele mosu konflitu beibeik iha ita nia suku laran”
Iha fatin seluk, Rozinho Ruas Brandão hatete tempu to’o ona Suku Bibileo atu mudansa ba dezenvolvimentu ho nune’e husu lideransa foun tenki servi komunidade Bibileo ho Asaun Bot.
“ Ami nia fiar hodi fo votus tenki iha rezultadu diak, liliu halo netik atividade ruma ba joven sira ne’ebé la kontinua eskola iha universidade ne’ebé iha deit suku laran atu joven labele mete problema no ita nia suku Unidade no dezenvolve”
Angelo R. Amaral nu’udar mós joven ida iha suku Bibileo hatete, esperansa ba lideransa suku foun mak tau matan ba komunidade husi aldeia 8 iha suku Bibileo, liuliu haree joven sira iha suku ne’e hodi moris hakmatek.
“Problema barak mak komunidade Bibileo hasoru maibé ha’u nia esperansa mak sefe suku foun tenki kontrola joven hodi halo atividade ruma, no halibur joven sira ne’ebé envolve iha Arte Marsiais labele mete problema, atu nune’e ita nia suku Bibileo moris hakmatek no iha Dame” Angelo hateten.
Hatan ba preokupasaun joven sira nian ne’e, sefe suku eleito Moises Acacio afirma importante tebes atu halo komunikasaun no besik ba komunidade no joven sira hodi buka dalan hamutuk ba abut husi konflitu sira ne’ebé akontese.
Foto Acacio, Sefe suku Eleito Suku Bibileo
“Aprosimasaun ho komunidade liliu joven sira iha suku laran hodi hatene problema nia abut, tanba sa mak konflitu akontese beibeik nune’e ita bele hatene no bele buka solusaun hamutuk tuir joven maoria nia hakarak hodi redus konflitu ne’ebé karik tuir mai sei mosu” Acacio informa.
Tuir dadus suku Bibileo iha Aldeia 8, ho total populasaun hamutuk 3228, Feto 1589, Mane 1639, uma kain hamutuk 711.
Discussion about this post