Radio, online – Deputado husi Bankada PSD Mario Viegas Carrascalão konsedera partido politiku (parpol) mosu barak iha nasaun ne’e tanba partido politiku sira moris kleur ona no sai bo’ot laiha aprosimasaun ba ninia militantes ho diak.
“See ita partido bo’ot mak halo aprosimasaun diak ho ita nia militantes sira konserteiza partido foun sira sei la mosu tan. Ita hare foun registu ne’e tanba nakfera husi partido bo’ot sira,”dehan Carrascaláo ba radioonline Segunda, (29/8) iha uma fukun PN.
Carrascaláo hatutan, partido foun mosu, signifika katak, partido bo’ot sira la konsege halo sosializasaun sira nia ideologia ba ninia militantes sira. Tuir Carrascaláo partido foun sira ne’e mosu laos ho ideologia mesmesak.
“Ita hare ne’e partido foun sira ne’e, ideologia tendensia inklina ba PD, PSD, Fretilin, CNRT no sira seluk tan mak junta hamutuk hari parpol foun,”nia reafirma.
Maske laiha provas mais Carrascaláo hateten, partido sira foun mosu ne’e iha tendensia halai liu ba hetan subsidiu husi estadu wainhira halao kampanha iha eleisaun jeral mai. “Bele hanoin hanesan ne’e bele lae mos,” Carrascaláo konfesa.
Iha parte seluk Deputadu Aderito Hugo da Costa husi CNRT mos rekoinese katak partido bo’ot sira la fo fatin ba foin sae sira atu tuur iha strutura mak, mosu tan parpol foun. Aderito uluk hanesan kongresita Fretilin nian ne’ebe sai Fretilin mudansa hodi tama ba CNRT iha 2007.
Tuir nia iha Fretilin mudansa mosu tanba Fretilin ne’ebe agora dadaun lidera husi Mari Alkatiri ho Lu-Olo lakoi fo fatin ba foin sae sira no lakoi atu mudansa iha parpol nia laran. ra
“Ita seidauk bele bandu ema atu loke parpol foun tanba ita adopta sistema demokrasi,”nia komenta.
Tuir dadus katak, partido foun sira mosu ne’ebe regiztu iha Tribunal Rekursu hanesan PDN ne’ebe nakfera husi PSD, Frente Mudansa nakfera husi Fretilin, no Chunto nakfera husi PDC.
Fiar katak la kleur sei mosu tan partido ida tan ne’ebe nakfera husi ASDT ne’ebe lidera husi Gil Alves tanba iha kongresu foin lalais ne’ebe lidera husi Gil Alves la hetan legitimasaun husi Tribunal Rekursu tanba uza atributu husi ASDT ne’ebe lidera husi Avo Xavi.
Discussion about this post