Radio online – Prezidente Komisaun Nasionál Juventude Timor-Leste (CNJTL) Leovigildo Ornai afirma katak, juventude Timor Leste tomak ko’opera ho entidade tomak iha rai ne’e, inklui Parlamentu Nasional hodi asegura eleisaun jeral 2012.
“Ami-nia vizita mai iha Parlamentu Nasionál ne’e atu oinsá hatene kna’ar hosi instituisaun ne’e, antes tama bá eleisaun jerál 2012 nune’e bele la’o ho susesu tuir ididak-nia knaar,” dehan Ornai ba jornalista Sesta, (12/8) wainhira lori juventude sira ba vizita uma Fukun PN.
Prezidenti CNJTL ne’e hatutan, foin sae nia knar importante tebes ba nasaun ne’e nia vida. Tanba ne’e importante tebes foin sae sira mai iha uma fukun ne’e hodi haluan foin sae sira nia hanoin katak nasuan ne’e presiza tebes juventude sira nia partisipasuan ba prosesu tomak.
Iha fatin hanesan Prezidente Komisaun H Parlamentu Nasionál António Cardoso Machado, ne’ebé simu delegadu-sira hosi CNJTL hateten, juventude iha kna’ar importante tebes atu dezempeña iha aspetu polítika. Tan-ne’e juventude sira tenke kapasita-an didi’ak molok tama iha partidu polítiku ruma.
“Juventude mai iha-ne’e atu haree fila-fali sira-nia rekomendasaun ne’ebé hato’o tiha ona tinan kotuk no buka atu hatene knaar hosi Komisaun H,” dehan Cardoso.
CNJTL-nia vizita bá Parlamentu Nasionál, no mós instituisaun seluk hanesan RTTL. Aktividades ne’e hala’o nuudár parte ida hosi selebrasaun loron Internasionál Juventude. Timor-Leste rasik selebra Loron Internasionál Juventude ne’e bá daruak ona.
Iha selebrasaun dahuluk tinan ida liu-bá, CNJTL hato’o ninian rekomendasaun bá entidade oioin iha rai ne’e kona-bá programa kapasitasaun bá joven-sira atu hola parte iha dezenvolvimentu iha rai ne’e.
Tuir Ornai, área ne’ebé esensiál atu CNJTL hetan kapasitasaun mak edukasaun, saúde no oinsá atu luta hasoru korrupsaun.
Timor-Leste sai hanesan paíz joven ida, la’os tan de’it foin hetan ninian independénsia iha tinan walu-nia laran, maibe tan kuaze metade hosi populasaun Timorense mak joven.
Maiské iha persepsaun katak joven mak sai hanesan ai-riin bá dezenvolvimentu, maoria joven dezempregu hela no númeru dezempregu ne’e hetook aumenta tintinan.
Iha Díli rasik, númeru dezempregu ne’e atinji 60 pursentu no hosi númeru ne’e barak-liu mak joven.
CNJTL durante ne’e hetan apóiu finanséiru prinsipál hosi Sekretáriu Estadu bá Juventude no Desportu, no ajénsia internasionál balu ne’ebé eziste iha Timor-Leste.
Discussion about this post