Radio, online – Sekertario Estado Promosaun Igualdade (SEPI) servisu hamutuk Pas Y Dessarollo, Rede Feto, Caucus, UN Women no NGO Forum organiza inkontro nasional ho tema “Lisaun Aprendijazen Feto Iha Moris Politika ho sub topiku “Instrumentu Legais Nasional no Internasional ne’ebe garante feto nia direito iha moris politika”. Seminar nasional loron ida ne’e iha salaun Canossiana Kinta, Becora, Dili (14/7).
“Ita koalia kona ba lideransa laos hare deit ba iha nivel nasional, maibe tenki prepara diak husi baze hanesan fundasaun ida ne’ebe forti,”Idelta konfesa.
Sekretaria Estado Promosaun Igualdade Idelta Rodrigues ba jornalista sira katak, governu aprovasaun lei eleitoral no TL prepara hela eleisaun geral tinan 2012. Tanba ne’e halao sorumutu nasional ho reprezentante 13 Distrito. Importante tebes atu prepara oinsa entre representante nivel komunitaria no nivel nasional atu bele fahe esperensia ba malu atu prepara estrategia hodi bele iha planu ba asegura eleisaun feto iha Parlamento Nasional tinan 2012.
Idelta hateten katak, konstituisaun garantia direito feto nian atu partisipa iha moris ka vida politika nian konstituisaun RDTL artigo 17 kona ba igualdade entre feto ho mane “Feto ho Mane tenki iha direitu ho obrigasaun hanesan iha area hothotu, familia nian, politika, ekonomia sosial, ho moris kultura.
Idelta hatutan, SEPI rasik halao asina akordo ho NGO Pas Y Dessarollo kona ba formasaun espesialmente ba iha komunidade liliu ba iha membrus konselho sukus iha nivel komunitaria ida ne’e mak preparasaun husi SEPI.
Espera katak,inkontro nasional ida ne’e sei lori hamutuk advokasia feto sira nian atu fo apoiu ba malu iha kestaun kona ba partisipasaun mazimu iha vida publiku no vida politikano hamosu solusaun inovativu sira atu kombate dezafiu sira neb ita hasoru ne’ebe limita ita nain partisipasaun mazimu iha sosiedade.
Koordenador ko’operasaun Espanhola iha TL, Javier Jose Calvino Pazos iha ninia intervensaun hateten katak, Paz Y Desarrollo hanesan organizsaun naun Govermental husi Espanha, servisu hamutu ho SEPI atu promove dezenvolvimento iha nasaun ne’e. Ninia indikador dezenvolvimentu iha okos tanba ne’e inkontro nasional ne’e ninia objetivu feto potensial sira bele hatene katak sira iha direito atu partisipa iha vida Politika.
Javier Jose Calvino Pazos hateten katak, ho meus importante ida tau hamutuk feto sira nudar feto potensial, ne’ebe importante iha komunidade, reprezentante husi 13 distritos. Husi seminar ne’e hodi fahe esperensia no troka inspresoes, atu nune’e bele promove, direito feto nian, enkorajen feto maluk sira seluk partisipa iha vida politika.
Koordenadora Paz Y Desarrolo fiar katak, ho objetivu ida ne’e maski ho tempu ne’ebe badak, maluk partisipasaun sira,bele hetan buat ruma no wanhira fila ba idaidak nia komunidade, bele fahe fila fali informasaun sira ne’e,ba iha feto maluk hotu, nune’e bele hetan resultadu husi objetivu inkontro nasional .
Iha fatin hanesan Prokurador Geral Republik Ana Pessoa hateten katak tuir nina hanoin feto iha vida politika importante tebes tanba feto tau intrese familia, nasaun no hanoin ho ninia kakutak rasik no difrente husi mane .
Ana Pessoa Afirma liu tan katak,feto tama iha politika ne’e politika sai riku soin liu no mos bele iha kontribuisaun prespektivu ne’ebe laos buat hotu hanesan..
Enkontru nasional ne’e hetan partisipa husi, Presidente Republika Jose Ramos Horta, Prokurador Geral Republik Ana Pessoa, Sekretariu Estado Promosaun Igualdade Identa Rodrigues, lider komunitaria husi Nivel no nasional, NGO Lokal No Internasional, representante komunidade husi 13 distrito.
Discussion about this post