Radio, online – Primeira Dama RDTL, Isabel Ferreira, Kinta-feira, (13/9) foin lalais ne’e, hala’o vizita traballu loron ida ba Suku Deleço, Sub- Distritu Railaco, Distritu Ermera, hodi haree besik kondisaun eskola refere, hodi hatan ba konvite eskola ne’e.
Iha nia intervensaun ba estudantes no komunidade Deleço, Isabel hateten hanesan Primeira Dama nia sei buka hodi ba vizita eskola hotu-hotu hahu hosi Pre-primaria to’o sekundaria hodi haree besik defikuldades no neseidades kada eskola nune’e fo hanoin ba governu atu bele atinji kualidade ensinu tuir planu Milenium Develoment Goals, (MGD).
Primeira Dama hatutan” Edukasaun importante duni no sai hanesan xave ba dezenvolvimentu país ida nian tamba ne’e husu ba imi estudantes sira aproveita hodi estuda no aprende”.
Iha oportunidade ne’eba mós Primeira Dama apela ba inan aman, emprezarius sira atu bele kolabora ho estadu hodi mobiliza solidaridade ba seitor edukasaun, hanesan fo suporta orsamentu no material tuir kbi’it ne’ebe iha hodi bele tulun hadi’a eskola sira ne’ebe ho kondisaun at.
Tuir Primeira Dama ho aktus ida ne’e mak bele atinji kulidade ensinu no infrastretura eskola. “Ha’u sei hamutuk ho imi ita ba tuku odamatan no fuan hodi fo tulun material ka osan dolar $1.00 ba eskola iha Deleço no mos iha fatin seluk. Ita labele hein de’it governu mak halo maibe persiza mos kontribuisaun hosi inan aman, ita nia emprezarius sira no sosiadade sivil sira,” apela Primeira Dama.
Eskola Primaria Deleço nia obra ho sala hat ne’e hetan apoiu Komunidade Edmund Rice hosi Asutralia iha tinan 2006. Eskola refere ho total estudantes 100 resin, profesores voluntariu nai’n 4 no permanente nai’n 1.
Discussion about this post