Ermera 20/11/2024- Komunidade iha Suku Laubana, Aldeia Leu- Bassa Kontente tanba sira la Susar ona ba bee moos.
Tuir Ana Rosa Maria Pereira haktuir katak, uluk Tilofe seidauk halo konserva bee, susar tebes mai hodi asesu ba bee moos tanba ami tenke kuru bee ho distansia ne’ebé mak dook oituan hodi uza ba nesesidade loro-loron ne’e, no bee matan ne’ebé mak iha ho volume ne’ebé mak ki’ik tebes hodi ami uza, maibé depois Tilofe halo ona konserva bee entaun agora bele oferese no sufisiente tebes.
“Ha’u kontente tanba konpara ho tinan hirak liuba ami la hetan bee, maibé ho prejensa Tilofe nian, ne’ebé ho inisiatiava di’ak ami bele hetan bee, uluk ami tenke sai iha dadersan tuku 5 no tuku 6 hodi hein bee, maibé agora la iha ona”.dehan Nia ba Jornalista sira, bainhira hala’o Media Tour.
Nune’e benefisiante ne’e akresenta tan katak, tenpu agora bele iha bailoron naruk, mais bee ne’e sempre iha no nunka maran, no la hanesan uluk ne’ebé ami tenke sai dader hodi hein bee, no balu hetan no balu la hetan..
Nune’e tuir Autoridade Lokál Xefe Aldeia Alfredo Maia Pires hateten agradese tebes ba programa ne’ebé Tilofe iha tanba uluk ne’e komunidade sira la hatene kona-ba oinsá mak bele halibur bee tanba ne’e durante ne’e bee susar tebes ba komunidade sira hodi uza ba nesesidade loro-loron nian.
“Ha’u dehan de’it bainhira programa Tilofe nian la’o kona-ba halibur bee, agora bee ne’e komesa ona fó benefisiu ba komunidade sira no to’o agora komunidade sira kontinua uza bee, uluk iha fulan Agostu Setembru sira ne’e bee maran ona, maibé agora tama ona mai Novembru mós bee seidauk maran” Dehan Autoridade ba Jornalista sira, Quarta Feria, 20/11.
Autoridade ne’e esplika tan antes Tilofe seidauk halo programa, bee debu ne’e iha maibé tanba ami seidauk hatene kona-ba konserva bee ne’e rasik, maibé programa ne’e iha ona, komunidade sira ke’e debu nune’e ohin loron bee iha to’o agora
Alfredo salienta tan bee ne’ebé mak konserva mak durante ne’e konserva de’it udan been hodi inflitra ba rai laran hodi fó moris fali bee matan sira seluk, no oferese ba komunidade sira, nune’e komunidade sira husi aldeia 4 mak asesu ba bee matan sira ne’e.
Iha sorin seluk Abrão Maia nu’udar xefe Juventude Movimentu Konservasaun Bee iha Suku Lauana haktuir katak, atividade konservasaun bee ne’e inisia husi tinan 2021 to’o agora atividade sira ne’e ami hetan formasaun husi Permatil asaun konservasaun bee ne’e servisu hamutuk ho Tilofe, objetivu husi konservasaun bee ne’e atu halo prevensaun husi risku degradasaun erosaun inklui inundasaun sira, Hateten Nia.
Nia haktuir katak parte seluk vantajen husi halo konserva bee ne’e hodi hamoris fali bee matan sira seluk nune’e komunidade sira bele moris no uza bee sira iha tenpu bailoron naruk nia laran.
“Ami husi Juventude Movimentu Konservasaun Bee kompostu husi 17 pessoas durante ne’e bee ne’ebé mak ami konserva mak udan been ka kolleita udan been, no ita ko’alia kona-ba baze hidrolojika ne’e iha fatin tolu mak hanesan primeiru debu natural, segundu mak tasi treseiru mak atmosfera. Ita ko’alia kona-ba baze hidrolojika mak debu natural sira, ne’e kapta udan-been sira husi foho lolon sira hodi inflitra tama ba debu laran nune’e bele fó moris fali bee matan sira iha okos, debu natural konserva hamutuk sia, no debu kria foun arte visial ne’e hamutuk 74 total debu hamutuk 88”.
Abrão esklarese tan katak, sira servisu ho Tilofe hodi konserva bee, sira mós kuda aikakeu, au, inklui Onuu ho Hali. Bee matan sira ne’ebé mak ami konserva mak bee matan 9 mak hanesan bee matan Saren, Aipun, Tuhuguan, Kolimauhahi Biguru Haehbehan inklui Rehein Manpnian bee matan hirak ne’e, fó moris husi bee matan Alosai..
Komunidade husi Suku Lauana Aldeia Leu- Bassa Posto-Administrativo Letefoho Munisipiu Ermera kompostu husi Uma-Kain hamutuk 116, habitantes 468, kompostu husi mane 250 no feto 218
Informasaun iha leten ne’e, AJTL servisu hamutuk ho Oxfam Timor Leste no hetan apoiu orsamentu husi Oxfam Hong Kong liuhusi atividade Media Tour iha Municupio Ermera Postu-Administrativu Letefoho Suku Leubasa.
Jornalista: Maria de Rosa
Discussion about this post