Kordenador Jeral Eskola EBF nu. 238 Tata-Mailau esplika eskola EBF Leu-bassa daudaun ne’e hasoru problema hanesan menus aula ba estudante sira hodi hala’o prosesu aprenijajen tanba eskola refere iha aula tolu de’it maibé estudante sira hahu husi primeiru ano to’o sexto ano, no sala ida ne’e uza ba armajen no eskritoriu inklui sala de aula, labarik sira eskola iha sorin ami uza sorin, Kordenador Esklarese.
“Ami menus aula hodi estudante sira uza ba prosesu aprenijajen, tanba ne’e mak aula ida primeiru ano no segundu ano hamutuk, treseiru ano quarto ano hamutuk nune’e mós hanesan quinto ano no sexto ano hamutuk, ami tenke halo hanesan ne’e, tanba eskola dader hotu “
Nune’e Kordenador eskola ne’e akresenta tan katak estudante iha eskola EBF hamutuk 189
kompostu husi estudante husi feto 112 no mane mak 77 nune’e professor sira ne’ebé hanorin estudante sira hamutuk na’in hitu.
“Aliende ami menus aula hodi estudante sira hodi uza hodi eskola, ami mós iha loron sabado ho estudante sira tenke ba kuru bee para hodi uza, ne’e obrigatoriu tenke kuru bee tanba bee ho distansia ne’ebé dok husi eskola”
Entretantu iha fatin ne’ebé hanesan tuir Autoridade Lokál Xefe Aldeia Alfredo Maia Pires haktuir durante ne’e servisu hamutuk ho professor sira hodi haree ba prekupasaun ne’ebé mak eskola ne’e hasoru tanba ne’e halo ona proposta ba parte edukasaun maibé seidauk resposta to’o agora, Nia Esplika.
“Nune’e bainhira aula la iha, entaun pasensia Professor sira tenke tau hamutuk estudante sira sala rua iha aula ida, entaun ha’u senti ne’e ladun di’ak ba estudante sira hodi aprende”.
Aliende ne’e Alfredo salienta tan eskola refere aldeia haat mak eskola iha EBF ne’e, aldeia haat mak hanesan Leu-bassa, Abasai, Hatulia Lelo no Le’aba Kraik, tanba ne’e autoridade refere hakarak mós rekomenda ba governante liuliu Ministerio Edukasaun nune’e bele aumenta tan sala de aula, hodi estudante sira bele uza tanba ita hatene katak estudante sira ne’e mak
futuru nasaun nian, dehan Nia iha loron quarta feira, 20/11.
Informasaun ne’e Jornalista hetan liuhusi atividade Media Tour iha Municipio Ermera Postu-Administrativu Letefoho ne’ebé AJTL Servisu Hamutuk ho Oxfam Timor Leste no hetan apoiu fundus husi Oxfam Hong Kong.
Jornalista Maria de Rosa
Discussion about this post