Radio, online – Tuir orariu, Sekertairu Geral ONU, Ban Ki Mon Kinta, (15/8) to’o iha Timor-Leste. Ban Ki Mon iha TL durante loron rua nia laran.
Governu Bloku Koligasaun (GBK) ne’ebe lidera husi Primeiru Ministru (PM), Kay Rala Xanana Gusmão, garantidu metin katak, durante vizita Sekertairu Geral ONU nian ne’e iha TL sei la akontese problema ruma ne’ebe afeta ba seguransa Nasional.
Vice PM, Fernando La Sama De Araujo, hateten, situasaun seguransa iha republika ida ne’e hakmatek tebes, tanba ne’e, polisia sei halo esforsu tomak atu asegura ambiente hakmatek ne’e durante vizita Ban Ki Mon nian iha Dili.
Sekretariu Geral ONU, Ban Ki Mon, sei hela iha Timor Leste durante loron rua: Kuarta to’o Kinta (15-16/8), hodi halo vizita kortazia ba Prezidente Republika, Parlamentu Nasional, sei hasoru malu ho Estudante Universitariu Nasional Timor Lorosa’e (UNTL) no aktividade seluk tan.
“Hau hanoin ita nia PNTL halo sira nia servisu diak no povo Timor Leste mos kontribui maka’aslos ba ita nia seguransa, tan ne’e sei laiha problema,” afirma Fernando La Sama De Araujo ba jornalista sira hafoin enkontrualtu nivel iha palacio Prezidensial, Aitarak laran Dili, Foin lalais ne’e.
Vizita Sekretariu Geral ONU Ban Ki Mon iha Timor leste, nu’udar vizita daruak nian, basa, Ban Ki Mon mai hikas tiha ona Timor leste hodi partisipa selebrasaun loron Restaurasaun Independensia 20 Maio 2002.
Ban Ki Mon,mai vizita Timor Leste, bazea ba konvite husi Prezidente da republika tuan Jose Ramos Horta, bainhira sei assume kargu hanesan Prezidente Da Republika.
Iha loron hanesan Ban Ki Mon, sei vizita mos Parlamentu Nasional ho objetivo atu hasoru malu ho Prezidente Parlamentu Nasional, Vicente Guterres I kontinua halo tan vizita ba Primeiru ministru Kay Rala Xanana Gusmão, nune’e mos realize jantar fraternizasaun iha Palacio do governu .
Iha vizita loron tuir mai, Kinta (16/8). Ban ki Mon sei hakat liu ba Casait, Distrito Liquiça, no fila hikas mai Dili hodi kontinua nia programa trabalho sai orador iha Universidade Nasional Timor Lorosa’e (UNTL) antes halo vizita ba Muzeum Rezistensia Timor Leste nian.
Discussion about this post