Maioria Komunidade Irabin de Baixo nia Natar Hetan Estragus Totál husi Udan Boot.

Viqueque, 20/09/24– Udan ho anin ne’e akontese durante loron tolu halo Komuidade Suku Irabin de Baico nia Natar Lawadare no Baidubu ne’ebé lokaliza iha Posto-Administrativo Uato-Carbau hetan estragu totál.

situasaun ne’e akontese tanba frajilidade irigasaun bee ne’ebé suli husi irigasaun laran surplus, nune’e kauza bee penetra no infiltra tama natar laran. Iha parte seluk irigasaun bee husi mota ne’ebé kanaliza mai natar laran sei uza de’it rai hodi taka no la fui semente nune’e fasil tebes hodi estragu natar bainhira iha tenpu udan.

Vítima husi Mudansa Klimatika Agustinho da Costa Mendes senti triste tebes, tanba hahan ne’ebé hein de’it ona kolleta hodi konsumu maibé derepente natureza no mudansa klimatiku ne’ebé akontese iha loron tolu.

“Fuan moras tebes, Ami-nia hare kalen tolu ne’ebé ku’a hotu ona, maibé udan boot iha loron tolu nia laran no hetan estrega, tanba ne’e ha’u husu ba parte relevante ruma hodi tulun no oferese netik Lona para salva no satan netik udan ne’e,” Vitima ne’e hato’o husi via telefone ba Jornalista, Sexta Feria (20/09).

Vitima ne’e haktuir tan, la’os de’it hare ne’ebé ku’a ona mak hetan estragus husi udan no anin maibé hare sira ne’ebé seidauk ku’a mós kuaze hetan estragus.

Aliende ne’e tuir Autoridade Lokál Jose Baptista do Carmo mós hateten triste tebes haree akontesementu ida ne’e, tanba udan no anin ne’ebé mai ho velosidade no kuantidade ne’ebé makas tebes hodi rezulta natar no hare ne’ebé ku’a ona inklui mós balu ne’ebé seidauk ku’a.

 “Natar rua ne’ebé hetan afeta mak hanesan Lawadare no Baidubu, Ha’u-nia Suku Irabin de Baixo durante udan bo’ot iha loron tolu nia laran ne’ebé mak akonpaña ho anin bo’ot no ohin udan durante oras lima nia laran no estrega ha’u-nia komunidade sira-nia natar” Autoridade ne’e haktuir.

Ho probelema refere Autoridade Lokál ne’e hakarak hato’o ba governo liuliu parte relevante hanesan Ministerio Agrikultura bele apoiu netik sasan baziku ruma nune’e bele fó ba komunidade afetadu sira.

Entretantu udan no anin ne’ebé akontese iha loron hirak nia laran, la’os estrega de’it populasaun sira-nia natar Lawadare no Baidubu. Maibé estrega mós populasaun sira-nia uma no sasan sira hanesan jelera rua nomós sasan baziku sira seluk ne’ebé iha uma laran.

𝐉𝐨𝐫𝐧𝐚𝐥𝐢𝐬𝐭𝐚: 𝐌𝐚𝐫𝐢𝐚 𝐝𝐞 𝐑𝐨𝐬𝐚

𝐄𝐝𝐢𝐭𝐨𝐫: 𝐍𝐚𝐭𝐚𝐥𝐢𝐧𝐨 𝐗𝐢𝐦𝐞𝐧𝐞𝐬