Dili 12,08,2024- Eskola Filiál Selegua harii iha tinan 2009 to’o agora sei nafatin hasoru problema fasilidade eskola nian no sira hato’o ona ba parte relevante maibé to’o agora seidauk iha resposta ba problema ne’ebé eskola ne’e hasoru hanesan menus fasilidade, menus profesores tanba fó impaktu ba estudante sira durante tuir prosesu aprendizajen iha munisípiu Baucau postu Administrativu Laga suku Sagadati aldeia Selegua.
Aliende menus fasilidade sira problema seluk mak menus bee moos hodi tein merenda eskolar ba estudante sira, tanba ne’e obrigatoriamente dader antes estudante sira hahu aula tenke kuru uluk bee ho distansia ne’ebé dook hodi lori ba te’in, hafoin hahú tama aula.
Tuir profesora EBF Selegua Terezinha Gusmão hatete katak, problema ne’ebe eskola ne’e infrenta prejudika tebes ba estudante sira nia prosesu aprenijazen bainhira tuir aula iha eskola.
“Problema ne’ebé ami ho estudante sira enfrenta mak menus fasilidade hanesan la iha haris fatin, meza kadeira la sufisiente, la iha bibleoteka, falta sala de aula ba estudante, bee matan dook husi eskola, inklui menus profesores hodi hanorin estudante sira, ” tenik profesora EBF Selegua Terezinha Gusmão
Nune’e reprezentante ne’e husu ba governu liuhusi Ministeriu Edukasaun atu kompleta fasilidade eskola hodi estudante sira hala’o prosesu aprenizajen ho di’ak.
Iha sorin seluk autoridade lokál xefe aldeia Selegua Alexo Belo Pereira haktuir, durante ne’e observa katak, eskola existe iha aldeia Selegua difikuldade barak mak estudante no profesores sira esfrenta, nune’e parte autoridade ho inan aman no klibur Estudante Joventude suku Sagadate (KEJUSS) voluntariamente iha inisiativa hodi halo eskola ida kompleta ho sala tolu no dapur ida ba estudante sira.
“Eskola EBF Selegua mós hasoru problema ida mak laiha bee moos, tanba iha tempu bailoron bee maran no afeta ba estudante sira tenki la’o dook hodi kuru bee ba tein merenda eskolar hafoin sira hahu aula,” konta tuir xefe aldeia Selegua.
To’o agora governu la tau importansia ba problema hirak ne’ebé eskola hasoru, nune’e parte autoridade lokál no grupu husi klibur estudante Juventude suku Sagadati (KEJUSS), mak esforsu hodi dada bee matan ba estudante sira.
Aliende ne’e, xefe aldeia mós rekomenda ba governu liuliu ministériu relevante atu tau matan netik ba estudante, tanba sira mak sai hanesan futuru ba nasaun ne’e nian.
Eskola EBF Selegua iha sala tolu hahu husi klase 1- 4 ne’ebé lokaliza iha sentru nune’e estudante asesu husi Aldeia tolu husi aldeia Selegua, Onebu’u, no Lalulai, total estudante 46 feto 18 mane 28.
Informasaun hirak ne’e jornalista sira hetan hafoin tuir atividade Media Tour ne’e realiza tanba AJTL kolabora ho OXFAM iha Timor-Leste no hetan fundus husi OXFAM iha Hongkong.
Jornalista : Maria de Rosa
Editor : Jonas
Discussion about this post