Organizaun Resistensia Sagrada Familia (ORSF) lamenta tebes ho atuasaun brutal ne’ebé Sekretariu Estadu Asuntu Toponomia no Organizasaun Urbana ho nia ekipa halo hasoru negosiante ho populasaun hafoin observasaun no akonpaña desizaun polítika husi IX governo konstituisional liuhusi SEATOU ne’ebé halo eviksaun ho forsada ba Timoroan sira ne’ebé okupa espasu públiku no Rai estadu iha Dili.
Portavoz ne’e haktuir jelarmente ORSF suporta polítika refere ho intensaun atu ordena espasu públiku ho ijeniu no promove dezenvolvimentu urbanu iha Dili, maibé prosesu eviksaun ne’e mak lamentavel tebes.
“Ami nota katak, autoridade governo lideradu husi S.E SEATOU la iha mekanizmu sistematiku no falta respeita ba direitu umanu durante eviksaun. Eviksaun ne’e mós sem konsultasaun adekuadu no menus partisipasaun husi parte intersadu sira” Nia hateten ba Jornalista Sira Liuhusi Konferensia Emprensa iha Sede ORSF, Quinta Feira ( 2/05 ).
Nia hateten, atuasaun brutal ne’ebé SEATOU ho nia ekipa halo hasoru negosiante ho populasaun balun, hahalok hanesan ne’e relembra fali violénsia naruk ne’ebé Timoroan hasoru durante okupasaun ilegal militar Indonesia.
“Ami fiar katak negosiante ko komunidade hirak ne’ebé okupa espasu públiku, sira ne’e mós uluk defende husi okupasaun Indonesia no sira la iha interese atu sai na’in, maibé nu’udar meius ida atu hatutan sira-nia moris”
Nune’e dirijente Organizasaun Resistensia Sagrada Familia ORSF hamriik hamutuk no solidariza ba sofrementu ne’ebé afetadu sira enfrenta tanba lakon hela fatin, lakon fatin atu buka moris, lakon rendimentu iha situasaun ne’ebé ekonomikamente vulneravel.
Liga ba ba situasaun ida ne’e ORSF hakarak hato’o ejijensia no rekomendasaun ba parte relevante liuliu husu ba estadu liuhusi governo atu prepara no aranzu polítika públiku ida ne’ebé mak Pro-povu atu labele sakrafika povu doben atu sai mukit no ki’ak liutan
“Husu mós ba Ecxelensia PM Kayrala Xanana Gusmao no konsellu ministru atu avalia fali polítika publika estadu nian ligaba eviksaun ne’ebé bele prevene aproximasaun violentu no forsadu fó atensaun no regulariza komprotamentu husi ekipa ne’ebé implementa eviksaun atu halao ho profesional no labele utiliza imtimidasaun no terror nu’udar meius atu atinje objetivu ba eviksaun”, Tenik Abrão ba Jornalista Sira.
Nia haktuir Eviksaun forsada hanesan ne’e sei promove liutan desigualidade injustisa no marnilizasaun ba sidadaun sira ne’ebé mak sosioekonomikamente vulneravél.
Aliende ne’e hakarak husu mós ba komando PNTL atu fó no bolu atensaun no loke prosesu investigasaun ba aktu brutal ne’ebé pratika husi menbru PNTL balun ba Joven ne’ebé deskonfia uza liafuan mal hasoru SEATOU
Husi Konferensia Emprensa ida ne’e ORSF husu komando F-FDTL Unidade Polisia Militar atu bele retira menbru PM sira ne’ebé mak envolve iha eviksaun hodi hatur lolos tuir konstituisaun. Nune’e mos husu ba governo hari sentru akollamentu ba familia vulneravel sira hodi asegura sira-nia direitu inklui labarik no ema ho difisiensia nomos Inan isin rua sira.
“Husu ba governo atu labele ignora ninia obrigasaun hodi fornese ninia asistensia ba familia afeitadu sira ne’ebé dezloka ona ba fatin seluk liuliu kria merkadu alternativu hodi sira kontinua atividade no prevene sira monu liutan ba situasaun vulneravel”
Aliende ne’e sira husu PAM Dili Sr. Gregorio Saldanha nu’udar figura Resistensia no sobrevivente ba Masakra Santa Cruz, atu halo esforsu makas liutan hodi la husik de’it terus no kanek ba populasaun sira ne’ebé mak foin lalais lakon hela fatin, inklui fatin negosiu no liuliu esforsu mós atu hari fatin seluk ne’ebé apropriadu ba sira hodi kontinua hala’o sira-nia moris
Maibé Portavóz ne’e husu sidadaun hotu-hotu, atu kontinua kopera no fó espasu ba governo hodi dezenvolve rai ne’e espesifikamente kapital sidade Dili. Nune’e ORSF sei kontinua hamutuk ho vitima ka afetadu sira hodi komunika ho autoridade sira hodi buka solusaun apropiadu ba situasaun ne’ebé mak komunidade sira enfrenta.
Entertantu, ekipa konjunta ezekuta serbisu bazeia ba Dekretu-Lei númeru 3/2024, 17 janeiru, alterasaun dahuluk Dekretu-Lei númeru 33/2008, 27 agusto, kona-bá ijiene no órden públiku. Nune’e mós, iha Dekretu-Lei númeru 51/2016, 28 dezembru kona-ba lisensiamentu mesajen publisitária, no Dekretu-Lei númeru 2/2027, 22 marsu kona-bá sistema jestan rezidu sólidu urbanu, inklui Dekretu-Lei númeru 3/2017, 22 marsu kona-bá rejime zona estasionamentu durasaun limitadu.
Jornalista : Maria de Rosa
Editor : Natalino Ximenes
Discussion about this post