Bunda hanesan komunidade LGBTQI+ sente livre no haksolok tanba hetan apoiu husi familia hodi halo ninia atividade loroloron, sai xefi iha grupu suku hena no iha kreativu oioin hanesan tein, Master of Cerimoni (MC), kuda ai-funan no transfroma aihan lokal ba modernu hodi ajuda familia sira bainhira iha serimonia ruma.
Naran ne’ebé konesidu ho Bunda mai husi nia tia mak fó wainhira nia ajuda nia tia partus, ho nune’e nia tia bolu bebeik Bunda, to’o komunidade hotu toman bolu naran ne’e. Bunda ho naran lolos Venancio Abilio Soares oan mane primeiru (trans feto) husi maun alin nain lima feto rua mane tolu, daudaun ne’e hela hamutuk ho inan aman iha Aldeia Palimanu Suku Fatuquero Postu Administrativu Railaku Munisipiu Ermera, Bunda la konsege remata estudu tanba hakarak ajuda ninia avo feto ho inan-aman.
Bunda moris hanesan komunidade LGBTQI+ maske moris ho sentimentu feto, maibé nia la hetan Diskriminasaun iha familia, nafatin konsidera hanesan oan mane boot iha uma laran no sempre hatudu respeitu ba nia, no Bunda mos sempre ajuda ninia familia halo servisu iha uma laran.
Bunda (transgender) dadalia ho Jornalista sira.
“Loron loron hau ajuda familia halo atividade uma nian hanesan haree labarik, tein, no hau mos iha kolega ida LGBT, ami rua sempre ajuda malu iha serimonia ruma ba tein no sai MC, atividade hirak ne’e hau la hetan osan maibe ajuda deit tanba familia, dalaruma sira hanoin hau fo osan oitoan, no osan ne’e hau ajuda neseidade uma laran ” hateten transjender ne’e ba jornalista sira iha loron 19/04/2024.
Bunda iha parseiru ne’ebe durante ne’e sempre suporta malu, no iha mos belun ne’ebé dalaruma fo konsellu ba Bunda atu moris tuir jeneru ne’ebé nia iha ona, maibe Bunda moris tuir saida mak nia sente.
“hau mos iha doben maibé seidauk iha mehi atu forma família, no iha kolega ne’ebe sempre koalia mai hau atu moris tuir saida mak sira haree, maishau hatan ba sira ho oin midar katak hau nia sentimentu mak nune’e maske ha’u hanesan feto maibé ha’u la halo aat ba ema ida, no hau nia inan aman mos sempre hadomi no suporta ha’u halo atividade saida de’it” nia konta ba jornalista sira iha nia hela fatin Fatuquero, Gleno-Ermera.
Agora transgender ho idade 29 ne’e harii tan grupu suku hena sai hanesan xefi grupu ne’ebé foin harií iha fulan Abril tinan ne’e, sira suku hena meja, ponto cruz, no desfiadu, kada hena hirak ne’e sira fa’an ho presu $5, ema sempre ba sosa, osan hirak ne’e tau hamutuk iha grupu, iha grupu suku ne’e kompostu husi feto 11.
“Ha’u nia objetivu harii grupo ne’e hodi ajuda mos kolega feto sira nia ekonomia falimilia, tanba osan ne’ebe ami hetan husi suku hena ami tabung deit, to’o osan barak, karik ami nia membro balu presiza, bele foti osan hodi apoiu nesesidade familia nian” dehan Bunda.
Iha fatin hanesan aman husi Bunda, Abel Xavier Amaral servisu hanesan agricultor hatete, desde Bunda kiik to’o boot nia sempre hatudu hahalok hanesan feto, nia iha alin mane nain rua ne’ebé forma ona família, Bunda mak seidauk iha hanoin atu forma familia tanba nia hakarak iha uma hodi ajuda familia.
Abel aman husi Venancio Abilio Soares(Bunda)
“Hanesan aman suporta de’it no husik livre nia hodi ajuda familia no ema seluk, hau la hirus nia, nafatin hadomi tanba nia mak oan mane boot iha uma laran, iha ami nia jerasaun tempu uluk ha’u nia tiu ida hahalok hanesan feto, ami halai ba ailaran iha tinan 1975 ema tiru mate nia. Tanba ne’e ha’u rona ema ruma dehan nia panleru ha’u la gosta no hirus ema sira ne’e, karik iha futuru mak nia hakarak forma familia ha’u hatan maibé nia hola fali mane labele tanba mane mai la halo servisu uma laran se nia hola feto di’ak liu tanba feto mai kaer servisu uma laran”dehan Abel aman husi Bunda.
Iha Sorin seluk Xefe Suku Fatuquero, Leonicia Trindade hatete, iha ninia suku durante ne’e tau atensaun ba komunidade, labarik, joven sira atu labele halo diskriminasaun ba ema ho defisiénsia no komunidade LGBTQI+.
“Dalaruma ita nia liafuan kasar bolu feto bermanek no mane buifeto maka ha’u rona bolu kedas nia no bolu nia inan aman mak tenke responsabilidade, tanba moris ne’e la’ós o mak halo, ne’ebé ba ha’u rona ema ida halo diskriminasaun ba ema ida nia moris, ha’u lagosta ne’ebé o laiha diretu atu ko’alia nia, no atividade ruma iha sede sukua mai sempre envolve ema LGBT sira ” xefe suku hatutan.
Bunda nia inisiativa harii grupu suku hena no halo ativivdade hira ne’e hetan apoiu maximu husi familia no autoridade local sira. Enkuantu Bunda nia atividade hirak ne’e Jornalista sira deskobre hafoin halao media Tour husi programa AJTL no OXFAM nian hodi aloka jornalista sira ba halo kobertura iha Munisipiu Ermera.
Discussion about this post