Liskisa (Maubar)-Importantes tebes ba feto vítima ida atu moris ho mehi ba saida mak nia hakarak rasik ba nia-aan iha futuru, sei furak liu tan bainhira futuru ne’ebé nia mehi fó benefisiu mós ba ema seluk.
Feliciana Serão de Jesus Carvalho, idade 40, oan na’in 4 feto 2 mane 2, husi Likisa-Maubara, Sobrevivente Violénsia Doméstika,agora dadaun nu’udar negosiante ba restorante Tia Janner iha Maubara.
Antes ne’e Feliciana la iha atividade seluk atu halo iha liur, nia iha uma de’it no durante tinan 10 forma família Feliciana la sente feliz tanba hetan violénsia físiku husi nia laen, nune’e iha tinan 2008 Feliciana deside fahe malu ho nia laen, hodi moris mesak ho nia oan sira.
“Bainhira hetan Violénsia Doméstika husi ha’u nia laen ha’u senti triste tebes, tanba nia baku sasan uma laran, baku ha’u, entaun ha’u senti ba labele ona, hanesan feen ida ne’ebé moris laiha kontenti. Entaun ha’u desidi di’ak liu ha’u fila-fali ba ha’u nia inan-aman. Entaun husi ne’e ha’u moris mesak no buka rasik halo negosiu nune’e bele tau matan ba ha’u nia-oan.” Haktuir Sobrevivente, Feliciana.
Hafoin tinan barak esforsu mesak, iha tinan 2022 Feliciana hetan apoiu husi Fokupers hodi hetan dalan ba nia moris no oan nia futuru.
“Ha’u agradese tebes ba Fokupers tanba ho Fokupers nia asistensia no akompañamentu mai ha’u mak ohin loron ha’u sai feto ida ne’ebé mak brani no hatudu ba ema katak, ha’u feto ne’ebé sobrevive husi Violénsia Doméstika brani ko’alia sai.” Dehan, Feliciana Serão.
Hanesan feto ne’ebé hetan esperiénsia moruk ba violénsia doméstika antes ne’e taka-aan barak liu, la brani atu ko’alia sai, hanoin katak laiha ona dalan. Maibé, hetan tiha asistensia no akompañamentu husi Fokupers, ohin loron Felicia bele brani ona foti desizaun, no nakloke ba ema katak, laiha ema ida moris perfeitu.
“Husi treinamentu sira ne’e mak loke ha’u nia hanoin hodi hariii rasik ha’u nia negosiu hanesan restorante ne’e, maske hahú ho fundus ne’ebé ki’ik maibé ha’u jere rasik osan ne’ebé iha. Agora dadaun mós karik iha treinamentu ruma Fokupers sempre fó oportunidade mai ha’u, ba tuir treinamentu sira ne’ebé mak Fokupers organiza.” Feliciana Akresenta.
Iha restorante laran feto kreativu ne’e fa’an Kafé, Jus no hahan. Bainhira Organizasaun ruma halo treinamentu sira sempre pesan Feliciana nia restorante, inklui Fokupers mós organiza treinamentu iha Likisa sempre pesan husi nia restorante.
“Ha’u halo negosiu loke restorante Tia Janner, hahú ho modal osan $ 700, ha’u empresta de’it ha’u nia maun nia osan, $ 500 dollar sosa sasan dapur nian.” Informa, Feliciana.
Nia esplika, husi negosiu ne’e, uluk loron ida hetan de’it $5 dollar, maibé agora ne’e loron ida bele hetan $30 dollar, sé ema pesan loron ida bele hetan $ 300.00 dollar to’o $ 600.00 dollar, loron bailet ne’e semana ida hetan $ 100.00 dollar.
Feliciana loke restorante ne’e, fó servisu ba kolega na’in rua mak servisu hamutuk ho nia, ne’ebé fulan ida ema ida hetan osan $ 100.00 dollar, no tau matan mós ba oan nia eskola.
“Ha’u senti orgullu tanba husi Fokupers ne’ebé fó oportunidade mai ha’u ba tuir treinamentu mak ohin loron halo negosiu no kontinua ba oin tan. Ha’u agradese ba Fokupers tanba husi Fokupers mak fó Counseling, fó korajen ha’u, ohin loron ha’u bele sai kontenti no haksolok, hanesan feto brani ko’alia sai no foti desizaun baa an rasik. Sé momentu ne’e mak Fokupers laiha, dalaruma ha’u nia moris la sai hanesan ne’e.” agradese, Feliciana.
Reportajen: Santina Lucia da Costa (Partisipante iha treinamentu GSR husi CSO)
Discussion about this post