Dedikasaun Ba Serbisu, Angel Hetan Konfiansa Nu’udar Jestora RKLM-Atauro Tinan 5 Ona

Atauro-Angelica Pacheco, ho naran istmadu Angel, hetan konfiansa sai jestora ba datoluk iha Rádiu Komunidade Lian Manukoko Atauro (RKLM-ATAURO).

Jornada Angel nian ba kargu ida ne’e hahu durante nia tempu iha Universidade da Paz, wainhira nia hakarak sai figura polítika. Tuir estudu iha área Direitu iha Departamentu Direitu Jeral no remata iha 2016, nia fó atensaun ba atividade sosial iha komunidade nia fatin iha Aldeia Maulaku, Suku Maquili.

Iha tinan 2019, Rádiu Komunidade Atauro fó oportunidade ba joven sira atu aprende kona-ba rádiu nune’e Angelica aproveita oportunidade ida ne’e apriende, ikus mai nia konsege hetan fiar  pozisaun hanesan jestora rádiu no lidera rádiu komunidade ne’e durante tinan lima ona.

Angelica hetan konfiansa ne’e liuhusi dezisaun membru konsellu polítika Radio Komunidade Atauro nian tanba nia nível edukasaun linsensiatura no nia mós ema ida ne’ebé ativu iha iha radio komunidade.

“Ha’u kontenti tanba hetan responsabilidade ida ne’e, no ha’u espera atu dezenvolve rádiu ne’e tuir kapasidade ne’ebé ha’u nian,” dehan Angel.

Durante Angel lideransa nia promove liu igualdade jéneru no enkoraja liu feto sira envolve iha atividade hotu-hotu iha rádiu, atu feto bele sira iha kapasidade hodi kontinua lidera radio iha futuru.

Oras ne daudaun Angel servisu hamutuk ho jornalista voluntariu mane nain 2 no feto 4 iha Radio komunidade Lian Manukoko Atauro.

Foinsa’e ho idade 31, hateten nia Nia motivasaun mai husi kondisaun sira nia haree iha nia rai natal, no nia determinadu atu dezenvolve rádiu ne’e atu reflete lian sira husi komunidade lokal.

“Maske ha’u hetan diploma ha’u la buka serbisu iha kapital maibé ha’u hakarak serbisu iha ha’u nia moris fatin no ha’u interese atu dezenvolve rádiu ne’e ba oin, hodi fó povo kbi’it laek sira nia lian,” dehan Angelica.

Durante nia jornada, Angelica hasoru defikuldade barak ida maka oinsá atu suporta ekipa atu bele halo serbisu efetivu iha serbisu fatin, maibé nudar jestora ne’ebé forte, nia mantein rezisténsia ka buka maneira wainhira hasoru difikuldade sira.

Difikuldade ne’ebé durante ne’e Angel no jornalista sira inferenta iha Racom Lian Manukoko Atauru mak la iha transporte hodi fasilita jornalista sira halo kobertura loroloron iha Postu Atauru ne’ebé iha suku lima mak hanesan Suku Beloi, Bikeli, Makadade, Makili no Vila Manumeta.

“Hanesan jestora, ha’u hasoru difikuldade barak, laos de’it husi fontes liur, maibé husi iha rádiu rasik hanesan menus fasilidade iha estudio hodi halo servisu loroloron. Maibé ha’u sei labele lori difikuldade sira hirak ne’e prevene ha’u, no hanesan feto, ha’u prense lidera rádiu ne’e,” nia hateten.

Husi konfiansa ne’ebé nia hetan nia rekuñese katak feto ho mane no ema hotu iha abilidade atu lidera importante atu sosiedade kria kondisaun justu no igual ba ema hotu tuir  konstituisaun RDTL, ne’ebé hakerek prinsípiu igualdade no inkluzividade iha Artigu 16 (universalidade no igualdade) no Artigu 17 (igualdade feto ho mane).

Reportajen : Luis Soares (Estudante Comunicação Social-UNITAL)

Editora : Desy Reis