Dili – Fundasaun Media Development Centre (FMDC) realiza treinamentu ikus etapa daahaat nia ba Jornalista ativu no futuru jornalista sira kona ba halo kobertura ne’ebe sensivel iha media.
Liuhusi ekipa monitorizasaun FMDC nian durante ne’e haree katak jornalista sira nia kobertura seidauk sensivel ba jéneru, barak iha notisia sira nebe publika kona ba kazu violensia doméstika tau sala liu ba feto, hodi halo mane sente forte hodi kontinua halo violénsia hasoru feto no labarik feto, ho nune’e FMDC nebe hetan apoiu husi UNWOMEN liuhusi projeitu ‘Hamutuk ba Igualdade finansia husi KOICA TL realiza treinamentu ba etapa ikus nian ba jornalista ativu sira no futuru jornalista hodi hasae sira nia komprensaun atu halo kobertura ne’ebé sensivel ba jéneru.
Tuir estudante departamentu Comunicação Social Universidade Oriental Timor Lorosa’e (UNITAL), Suzana do S. Rodrigues hateten iha treinamentu ne’e bele kompleta ninia teoria sira nebe durante ne’e hetan iha estudu universitario no bele halo nia iha komprensaun diak hodi halo reportajen nebe sensivel iha pratika.
Jornalista Filomena husi Neon Metin
“husi treinamentu Reportajen Sensivel Jeneru ne’e hau nu’udar futuru jornalista bele komprede diak kona ba oinsa halo kobertura nebe bele eduka komunidade sira liuhusi produsaun jornalistiku nian kona ba violénsia doméstika, no fo sai mos informasaun sira kona ba feto nia susesu nune bele eduka ita nia sosiedade katak feto bele’’ dehan Suzana.
Iha fatin hanesan jornalista Filomena da Conceição, husi media online Neon Metin hateten “formasaun ida ne’e halo hau komprende diak kona ba mitu no faktu sira iha ita nia sosiedade no mos bele halo produsaun ba notisia ka istoria ruma valoriza mos feto maluk sira nia servisu, no feto sira iha area rural ne’ebe sai vulneravel liu”
Tuir Diretor FMDC Francisco da Silva Gary, iha nia lian mak taka hateten treinamentu ida bele kompleta jornalista sira nia knar hodi haree ba violensia sira nebe akontese iha sosiedade atu bele halo mudansa liuhusi informasaun sira ne’ebe transmite husi media.
Diretor FMDC hatoo hela lian Maktaka
“treinamentu ida ne’e bele forma imi hanoin hodi komprende kona ba saida mak Violensia bazeia ba jeneru, tipu violénsia no konsekuensi sira husi violénsia, no mos sai hanesan bukae ba imi hotu no bele ajuda ita bot sira nebe jornalista hodi halo pratika iha servisu loroloron liuhusi konesimentu no avalidade hirak ne’e bele muda sosiedade nia hanoin kona ba normas sosiais iha Timor Leste liuhusi ita bot sira nia produsaun ”
Diretor ne’e mos enkoraja ba futuru jornalista sira espera bele aproveita oportunidade hirak ne’e hodi bele kompleta sira nia estudu iha universitario liuliu iha area komunikasaun sosial nian.
Formasaun ne’e mós iha faselitador/a nain tolu mak Matilde Coelho da Silva hanesan konsultan ba FMDC no formador/a seluk mak Desi Reis no João da S. Sarmento. Treinamentu ba dalahaat (4), halao durante loron 5 hahu husi loron 18 fulan Jullu to’o loron 22 fulan Jullu, partisipante hamutuk 36 maioria husi estudante Comunicação Social husi UNTL no UNITAL inklui Jornalista ativu sira.
Discussion about this post