UN WOMAN-FMDC KONTINUA FÓ FORMASAUN REPORTAJEN SENSIVÉL JÉNERU BA JORNALISTA SIRA

Dili, 03 Juñu 2023-UN WOMAN servisu hamutuk Fundasaun Média Development Centre (FMDC) kontinua fó formasaun ba jornalista no Média officer sira husi ONG no estudante Universitariu Comunicação Sosiál UNTL no UNITAL sira iha Dili kona-ba reportajen sensivél jéneru.

Objetivu husi formasaun ne’e hanesan kontinuasaun ne’ebé no UN Woman ho FMDC halo ona iha tinan kotuk, atu eleva koñesimentu jornalista sira nian kona-ba oinsá hakerek nótisia ka halo reportajen ho sensivél ba asuntu jéneru iha Timor-Leste.

Konsultan FMDC Matilde Coelho da Silva hanesan formadora hateten, asuntu violénsia bazeia ba jéneru sai problema bo’ot ba Timor-Leste no Jornalista sira balun halo mós halo reportajen la respeita sobrevivente ou vitíma sira nia privasidade liu husi konteúdu nótisia.

^{Sra. Matilde Coelho da Silva, Akompaña hela grupu diskusaun}

“Violensia bazeia ba jéneru ne’e asuntu sensitivu koalia kona-ba sobrevivente no vitíma ida ne’e jornalista sira tenki respeitu sira dignidade no privasidade atu labele hamosu violénsia tan”, katak Matilde iha salun FMDC Hudi Laran, Dili.

Liu husi formasaun ne’e Matilde husu jornalista sira atu kuidadu no responsalibidade fó informasaun ne’ebé loloos bazeia faktus hodi hadi’a kualidade vida iha Timor-Leste i jornalista hola papél importante atu hadia sosiedade liu husi informasaun.

Nune’e mósMadalena Reis Jornalista husi Média Esperansa hanesan formanda haktuir, husi formasaun ne’e ajuda komprende di’ak kona-ba mitus no faktus husi violénsia nune’e tulun nia atu halo reportajen/hakerek nótisia no sensivél jéneru.

“Hanesan jornalista saida mak hetan husi treinamentu ne’e ajuda tebes oinsá atu hakerek nótisia kona-ba asuntu jeneru nian ho kuidadu no bainhira halo reportajen tenki ho sensivél atu nune’e labele kontribui ba hamosu violénsia”, tenik nia.

Nia mós husu ba kolega jornalista ne’ebé hakerek nótisa kona-ba asuntu violénsia buka atu kapasita an liu husi treinamentu sira no le’e barak asuntu violénsia nian atu nune’e bele hakerek nótisia ne’ebé faktus hodi bele eduka públiku no le’e nain sira bele komprende liuliu titulu nótisia.

Fatin hanesan Adão Madeira Estudante Comunicação UNITAL agradese tanba bele hola parte iha formasaun ida ne’e atu aumenta nia koñesimentu hodi aplika nune’e kontribui atu labele hamosu violénsia iha sosidedade, tanba tuir nia dalabarak sosiedade seidauk intende di’ak violénsia bazeia ba jéneru liuliu ba inan feto no labarik feto.

^{Adão Madeira, Estudante CS UNITAL.}

Formasaun kontiuasaun ba Etapa daruak ne’e fasilita husi Teódosia Dos Reis no Membru AJTL,  partisipante hamutuk 35 ne’ebé mai husi Jornalista ativu sira iha Dili no Radio Komunidade, inklui Estudante Comunicação Sosiál UNTL no UNITAL. Formasaun ne’e hala’o durante loron 5 hahú husi loron 30 maiu-3 juñu 2023, hetan suporta husi UN Women iha Timor-Leste no apoiu fundus husi Governu Korea liu husi ajénsia KOICA.

Reportajen : Natalina Araujo & Jonas

Editor : Jonas