Radio, online – Ministru Agrikultura no Peskas, Mariano Assanami Sabino fiar katak, ba oin Timor-Leste sei soberania ba aiha rasik hodi fornese ba ninia povu.
Assanami kasu lia hirak ne’e iha Palacio Prezidensial Aitarak Laran, Tersa, (28/8) wainhira remata hasoru malu ho Prezidenti da Republika, Taur Matan Ruak.
Tuir Assanami, “Ita disiplina ba povu agrikultor, tamba ita ukun-an ona maibe presiza ukun an mos iha iha parte aihan.
Assanami hatutan, soberania aihan ne’e importante. Povu Timor mak tenki han duni ninia aihan, laos han fali ema seluk nia aihan. Ida ne’e importante tebe-tebes ba seguransa alimentar.
Ba oin Ministru MAFP ne’e husu povu agrikultor tenke esforso hamutuk ho fasilidade husi governu atu serbisu ne’e tenke lao ba oin. Aihan lao diak signifika bele hamenus kiak husi povu ne’e.
“Ita nia objetivu laos deit seguransa alimentar maibe oinsa para hamenus kiak, oinsa mak setor agrikula ne’e sai fali seitor produktivu, seitor ekonomiku ne’ebe potensial,”Assanami esplika.
Atu hasae produsaun aiha, Assanami dehan ba oin presiza esforsu manutensaun ba tratores ne’ebe fahe ona ba distritu sira.
“Ohin hau koalia ho PR Taur ba iha area peskas nian. Ba futuru ita bele dezenvolve oinsa kaer ikan iha tasi klean, tasi ninin no iha tasi ibun. Budu tasi, kadiuk no boek ne’ebe mak ba oin ita hakarak dezenvolve,”Assanami haktuir.
Assanami hatutan, iha are floresta, iha seitor tolu maka importante. Floresta produktivo ai ba industria, ai ba karpintaria no ai kameli.
“Area protezida hanesan Parke Nasional Koni Santana. Ita mos iha area rejerva Tiliomar, i mos foho matebian Ramelau Kablaki. Iha future ne’e oinsa sai turismu natural ne’ebe proteje ita nia natureza,”dehan Assanami .
Iha sorumutu ho PR, Taur Ministru MAFP foka liu ba politika iha futuru, tinan lima ne’e. “Ita hothotu tenke kaer metin katak, Timor ita hotu nian ita hotu tenke esforsu para eleva ekonomia Timor,”presta Ministru husi PD ne’e.
Discussion about this post