Radio, online – Horiseik dader, Tersa, (14/8), Dirijente Altu Komisaun Anti-Korrupsaun (KAK) partisipa iha sorumutu ida nebe Komisaun Funsaun Públika (CFP) organiza. Objektivu husi sorumutu ne’e atu troka hanoin no vizaun ruma kona-ba oinsa atu prevene no kombate korrupsaun iha funsaun públiku no oinsa atu hametin koordenasaun servisu entre Instituisaun rua ne’e iha área administrasaun.
Komunikadu da emprensa ne’e radioliberadade online simu husi KAK liu husi via email Kuarta, (15/8).
komunikadu ne’e hatutan, iha sorumutu durante oras rua iha Salaun inkontru CFP ne’e, parte tim KAK lidera husi Komisáriu Adérito de Jesus Soares no parte tim CFP lidera husi Komisáriu Libório Pereira.
Sorumutu amizade ne’e hanesan parte ida husi inkontru regular entre ofisiais altu husi KAK no CFP. Komisaun rua ne’e servisu hamutuk iha área jestaun rekursu umanus hahu kedas, wainhira KAK harii, liu-liu relasiona ho rekrutamentu funsionáriu públiku ba pozisaun lubuk ida iha KAK.
Iha sorumutu ne’e, Komisáriu KAK esplika konaba progresu no dezafius nebe KAK hasoru iha prosesu hari instituisaun, nebe kapasidade rekursu umanus, evaluasaun ba dezenpenñu, étiku servisu sai hanesan fatores importante iha prosesu harii instituisaun estadu ho efetivu.
Liu tan ida ne’e, Komisáriu KAK hatete, tane aas integridade institusional ne’e importante tebes—buat hirak ne’e persija transparensia no akuntabilidade, profesionalismu, honestidade, lealdade no imparsialidade husi funsionáriu públiku sira.
Husi parte Komisaun Funsaun Públiku nian, Komisáriu Liborio Pereira koalia kona-ba importansia husi implementasaun kona-ba kódigu prosesu disiplinaria funsaun públiku nian se karik iha funsionáriu públiku ruma komete hahalok la tuir regras nebe iha.
Molok taka, Komisáriu KAK espresa nia laran luak hodi konvida Dirijente Altu CFP atu halo fali vizita mai KAK ho nia staff iha tempu besik mai atu fahe informasaun konaba servisu CFP nian, leis no prosedimentus nebe regula funsaun públiku sira.
“Ida ne’e importante tebes hanesan parte ida hodi promove komunikasaun efetivu enter instituisaun rua ne’e,”dehan Komisairu KAK.
Discussion about this post