Radio, online – Komisaun Anti Korupsaun (KAK) bolu urjenti Sekertairu Estado Meu Ambiente, Abilio de Jesus Lima hodi halo ivestigasaun konaba abuzu poder ba nia staff sira no uza patrimoniu estadu nian sai fali privadu.
KAK halo investigasaun ba Sekertairu Estadu Abilio Lima iha oras rua resin nia laran Tersa, (15/5) iha edifisiu KAK nian, Farol Dili.
Depois remata investigasaun ba jornalista Sekertairu Estadu Abilio Lima dehan, , ninia prezensa iha KAK, tamba iha ninia fungsionairu balun mak hatama keisa ba KAK hodi nune’e KAK bolu urjenti.
“Hau mai iha KAK ne’e tamba hau nia staff sira mak hatama keisa ba KAK dehan hau foti desizaun uza kareta estadu nian naran deit. Staff sira balun mos la kontenti tamba hau foti desizaun foti kareta iha sira nia kompetensia,” Abilio konfesa.
Ba KAK tuir Abilio katak los duni, dala ruma kareta estadu Sekertairu Estadu ne’e nian at, Abilio uza fungsionairu sira nia hodi ba hare hau nia familia moras, no familia balun mate, iha Lauana, Ermera.
Sekertariu Estadu ne’e rekoinese katak, los duni nia uza kareta estadu nian ba hare nia familia tamba ninia kareta privadu laiha. Abilio mos dehan, nia nunka uza kareta ba intereses partido nian durante ne’e.
Perguntas KAK mai hau mak ne’e, konaba desizaun hau foti kareta, prosesu to’o desizaun halo nusa, pratika uza kareta ne’e oinsa, uza kareta ne’e nusa no hau intrega kareta ne’e ho koindisaun oinsa. Hau sentei ne’e laos segredo ida,”dehan Sekertairu Estadu husi partido PSD ne’e.
Tuir Sekertariu Estadu Meiu Ambiente ne’e, KAK nia serbisu importante, nudar membru governu tenke mai, nudar mos sidadaun ida tenke mai kumpri. La iha razaun ida la bele mai.
“Hau nia kestaun mak ne’e ita koalia abuzu de poder ita tenke hare didiak, tamba hirarkiamente hau tenke oriente ba kraik. Hau iha obrigasaun atu implementa ba karik. Maibe ikus mai dehan hau halo abuzu poder. Hau hanoin buat hotu la lao wainhira membru governu labele uza kareta estadu nian. Hau komprende, hau la uza fasilidade naran naran deit,”nia komenta.
Ikus liu Sekertairu Estadu rekomenda ba KAK atu hare ba abuzu poder ned’ebe grave liu. Tuir nia, justisa tenki ba ema hotu.
“Ita nia justisa la bele ba ema ema balun, maibe ema balun lao avontade halo tuir sira nia hakarak. Karik balun halo abuzu poder barak liu maibe ita taka matan tiha. Buat ki’ik ita levanta, buat bo’ot ita taka fali ne’e hau la konkorda hanesan sidadaun, laos Sekertariu estado,”dehan Abilio ho remata.
Discussion about this post