Radio, online – Tribunal hasai karta notifikasaun ba advogadu uma kain 3 iha Kolmera (besik restorante mama restu nia sorin) hodi fo orden ba Polisia Nasional Timor Leste (PNTL) sobu uma no tenki husik mamuk fatin refere.
Polisia Distritu Dili, unidade Nasional Task Force obrigatoriu sobu komunidade uma kain tolu ne’ebe hela iha rai estado iha colmera, Segunda/27/02/12.
Maria da Silva hanesan komunidade ne’ebe hela kleur ona iha rai ne’e hateten katak. “ami rekoinese, rai ne’e laos ami nia rai privado maibe rai estado nian. Ami la konkorda mak estado duni sai ami depois haruka ema estranjeiru mak atu okupa rai dia ne’e. Tamba ema estrangeiru la iha direitu atu hetan rai iha nasaun ne’e,”Maria dehan ho trsiti.
Maria ho nia familia hela iha Komera laos iha 1999 mak okupa rai mamuk ne’e, maibe hela iha rai ne’e desde tinan 1984.
“Ami sei la fo rai ne’e hodi ba ema estranjeiru uza hodi halao aktividade negosiu, iha ami nia terus leten. Ami mos terus ba rai ida ne’e iha prosesu ukun-an ne’e,”Maria dehan ho ran nakali.
Maria hatutan, problema rai ne’e ho Sugiono ema Indonezia, ne’ebe okupa rai ne’e. Kazu ne’e Sugiono ba lori to’o iha tribunal hodi halao prosesu maibe to’o loron ikus atu fo sai resultado tribunal la bolu vitima uma kain tolu ne’e. Tribunal seidauk foti dezisaun fo karta notifikasaun maibe derepente deit tribunal haruka PNTL mai sobu uma kain 3, ne’e signifika katak tribunal servisu lalos.
Rai ne’ebe agora Sugiono okupa ne’e uluk tempu Indonesia hanesan fatin Xefi Sede Suku depois Timor ukun an mak nia sosa iha ema ida maibe la iha dokumentus rai ninian. Iha deit mak surat jual beli.
“Ami la hatente tamba saida mak estado duni sai husi fatin ne’e ne’e signifika manipula husi Sugiono,”Maria kestiona.
Maria salienta liu tan katak,tribunal labele uza forsa hasoran povo no PNTL tamba ita mesak Timor oan laos ema seluk uluk iha funu laran mate ka moris ita hamutuk ukun an agora ita ukun an labele soran Timor oan ho Timor oan.
Nia esklarese liu tan katak, estado duni uma kain 3 ne’e hodi nune’e haruk ema estranjeiru atu halo loja bo’ot. Iha prosesu hasai sasan husi uma laran ne’e, Sugiono ne’ebe sosa rai ne’e la marka prezensa.
“Ami la sai husi fatin ne’e tamba ami sidadaun Timor oan mos iha direitu atu hela iha rai estado laos ema estrangeiru mak atu okupa rai estado ida ne’e signifika estado manipula,” Maria komenta.
Iha prosesu hasai obrigatoriu ba uma kain 3 ne’e halo transporte hotu si paradu (macet-red).
Discussion about this post