Radio, online – Horseik (9/1) lokraik kuaze tuku 16: 00 kareta estadu nian ho nomor plat 03* 358 G merk Prado para los iha ofisiu Asosiasaun Advogadu Timor Loro Sa’e (AATL) nia oin iha Bairu Grilos. Maibe ema ne’ebé lori kareta nudar mós ofisial Governu nian ne’e tama ho lalais deit bá iha Aje bar ne’ebe iha los My Flower bar nia sorin.
Ba jornalista Radio Liberdade seguransa AATL ne’ebe lakoi fo sai ninia naran hateten, kareta ho plat Governu sira ne’e dala barak mai iha bar ne’e hodi bá vizita feto Xina sira iha laran.
“Dala ruma sira mai para iha ami nia kantor oin, maibe sira la mai iha ne’e. Sira halo finji para besik iha ne’e, maibe sira tama ba iha bar rua ne’e hodi hasoru feto Xina sira,” nia dehan.
Tuir nia, ema bele mai vizita, maibe labele uza sasan estadu nian sa tan kuatru óras, ne’e sei óras servisu nian, maibe ema ofisial Governu naok tempu servisu nian mai fali feto aat sira.
Pesoál ida hosi AATL hateten, nia kuinese ofisial Governu ne’ebé tama bá iha bar ne’e. Nia dehan maun ne’e nudar direitór ida iha SEFOPE.
Ema sira hanesan ne’e la fó benefisiu di’ak ba estadu, maibe estraga tan deit tamba uza fasilidade estadu nian hodi uza aribiru deit, nia dehan.
Tuir observasaun jornalista nian, ofisial Governu nian ne’e kleur tebes iha fatin ne’e, kuaze han oras ida ho balu.
Bainhira fila hosi bar refere, ofisial governu ne’e lao ho moe no tama lalais bá iha kareta laran tamba ema balun finji mear ba nia.
Governu dadaun ne’e halo hela esforsa oinsa atu kontrola kareta estadu nian ne’eb’e ofisial sira uza la tuir politika estadu nian. Maibe buat sira ne’e kontinua akontese no seidauk iha sansaun ba sira ne’eb’e viola.
Discussion about this post