Radio, online – Movimentu Estudante Universitariu Juventude Distrtito Lautem (MEUJ-DL), hanesan agente kontrola sosial no agente transfromasaun sosial ejiji ba governu atu halibur lalais restu mortais da patria, tanba ho saudozu sira ne’e mak konsege hetan libertasaun nasaun ne’e.
Movimentu estudante ne’ebe ho nia prinsipiu humanitariu, solidariedade no fraternano libertar hato’o kestaun ne’e liu husi konferensia da emprensa Segunda, (24/10) iha Kampus UNTL Kaikoli. Estudante Lautem, husu mos atu estadu hanoin konaba saudozo sira nia loron mate ne’ebe estadu seidauk rekonhese hanesan loron bo’ot nasional.
Porta Voz MEUJ-DL, Juventina Ximenes dehan, iha tinan rua nolu resin hat nia laran, funu nain no povo maubere mak luta ba rai ida ne’e hodi liberta maibe to’o ohin loron estadu seidauk rezolve restu mortais martires da patria, ne’ebe ohin loron sei naklekar iha teritorio. Ate agora mos estado seidauk rekolha hodi ba halot iha semitariu jardin da herois.
“Ami husu ba orgaun soberanu ne’ebe sai hanesan mata dalan ba povo maubere atu bele konsidera asuntu sira ne’e,”Juventina husu atensaun.
Alende ne’e mos estudante Distrtito Lautem ne’e ejiji ba Presidente Republika, Parlamentu Nasional no Xefi governu atu valoriza loron 11 de Marsu sai hanesan loron bo’ot ba saudozo Komandante Nino Konis Santana, hanesan heroi ida ne’ebe luta ba prosesu libertasaun da patria. To’o agora saudozo nia loron morte estado seidauk deklara sai hanesan mos tinan-tinan estadu selebra ba saudozo Prezidenti Nicolau Lobato nian iha dia 13 Dezembru.
Husu mos atu estadu hare ba loron dia 7 de Dezembru kada tinan halo komemorasaun ba funu nain sira no refleksaun bo’ot ba istoria luta ba libertasaun nasional, hodi nune’e gerasaun foun lembra nafatin no banati tuir iha jerasaun futuru oin mai.
Entrentantu estudante hirak ne’e husu atu hari’i movimentu bo’ot ba vitima sira ne’ebe mate iha funu nia laran hanesan Muapitine,Maununu,Kararas,Mausiga,Zumalai,Liquisa no fatin sira seluk.
Porta Voz ne’e afirma bainhira ejijensia hirak ne’e estadu la konsidera iha tempu badak nia laran mak estudante iha front nia laran husi 13 distritu sei hamutuk ho povo maubere tomak lakohi fo nia votus ba iha eleisaun jeral 2012.
Discussion about this post