Radio, online – Dirasaun Nasional Seguransa Publik (DNSEP) hamutuk ho Polisia Nasional Timor Leste, Distrito Dili iha oras tuku 6:00 otl (20/10) lori karta notifikasaun husi tribunal uza bolduzer sobu obrigatoriu uma kain 7 ne’ebe mak hari iha estrada ibun besik loza Plaza Timor nia oin.
Iha asaun husi DNSEP ho PNTL ne’e halo povu uma kain 7 ne’e hakfodak tanba dadersan deit ba sobu sira nia uma, ne’ebe konsedera husi uma nain laiha kordenasaun diak.
Maria Ximenes hanesan uma nain ne’ebe mos hanesan vendedores fa’an modo iha Timor Plaza nia oin hateten, DNSEP ho PNTL mai sobu uma ne’e la iha informsaun mai ami, derepente deit iha dader san sira mai sobu uma no ai oan ne’ebe komunidade sira kuda.
Iha prosesu sobu ne’e halo uma nain Maria Ximenes hateke ho matan be’en. “Hau sente triste banhira polisia ho DNSEP dader san deit sobu uma ne’e. Timor Leste ukun an ne’e governu nunka tau matan ba ami povo ki’ik ne’ebe agora moris iha kiak nia laran,”nia komenta ho matan ben.
Maria hatutan, durante nia halo uma ne’e laiha ajuda husi governu, mais atu sobu no estraga governu uza polisia sira mak halo at uma ne’e. Maria dehan, desde uluk kedas sai husi ai laran ami povo ki’iak nunka tane liman ba governu tun sae. Maibe ami moris ho ami nia kosar ben rasik susar ka terus ami buka rasik fo han ami nia oan sira no fo eskola laos tane liman tun sae ba governu AMP ida ne’e.
“Ami nia hela fatin sobu ona, ami mantein nafatin hela iha fatin ne’e tamba ami iha tempu uluk ami mos toba iha dut leten no foer nia laran,”nia konfesa.
Iha prosesu sobu uma 7 ne’e membru PNTL hamutuk ho DNSEP mak hasai sasan sira husi uma laran ba tula iha kareta ne’ebe prepara hela. Uma nain hare deit.
Tuir Komandante PNTL Distritu Dili Pedro Belo hateten, Polisia kumpri lei ho orden. Polisia ba sobu uma 7 ne’e tanba hetan karta notifikasaun husi Tribunal Distritu Dili. konaba problemas atu selu sasan sira no kompensasaun ne’e uma nain sira ba koalia ho Timor Plaza.
Funsionariu ida husi Timor Plaza ne’ebe lakoi temi nia naran heteten, uma kain 7 mak hela iha rai ne’e, laos nain ba rai. Rai ne’e pataraun Timor Plaza tiha ona husi rai nain. Tanba patraun lakoi hasai uma kain 7 hanesan ne’e deit, ho ida ne’e patraun Timor Plaza hari uma no fo rai iha Timor Plaza nia kotuk. Maibe uma kain 7 ne’e lakoi ba hela tanba senti klo’ot liu.
Discussion about this post