PR Horta Kontinua Apela ba Povu Kria Dame no Unidade Iha Sosiedade Laran

Radio, online – Prezidente da Republika (PR), Josè Ramos-Horta hahu loiu husi vizita trabalho, durante loron hat iha distritu enklave Oecuse. Vizita ho objektivu hodi hala’o dialogu ho komunidade iha distritu ne’e, nudar parte ida husi inisiativa Xefi Estadu nian atu hari dame no unidade iha nasaun laran, tuir konstituisaun haruka.

Depois to’o iha Pante Makasar, Xefi Estadu ne’ebe akompañadu husi autoridades lokal husi area refere, hala’o kedas vizita ba sub distritu Oesilo hodi hasoru malu ho komunidade no autoridade lokal husi sub distritu refere.

Depois ramata hala’o vizita iha Sub distritu ne’e. Iha loron tuir mai, 28 Setembru 2011, PR Horta ho komitivas kontinua hala’o vizita hanesan ba sub distritu Pasabe.

Ba komunidade rihun ba rihun ne’ebe simu nia iha sub distritu rua ne’e, Xefi Estadu hato’o ninia apelu atu sidadaun hotu-hotu, inklui komunidade Pasabe no Oesilo kontinua hari dame no unidade iha sira nia sosiedade laran.

Alende ne’e, hare-ba situasaun geografika distritu Oecuse nian ne’ebe besik ho teritoriu Indonezia, Prezidente mos husu atu komunidade iha parte ne’e bele kria mos amizade ne’ebe metin ho sira nia viziño husi parte Indonezia nian.

Relasiona ho eleisaun jeral ne’ebe sei akontese iha tinan oin mai, Prezidente mos la-haluha husu ba partidu politiku hotu-hotu atu hala’o dialogu bebeik, atu nune’e bele hadok-an husi violensia iha festa demokrasia tinan oin mai.

Iha tempu ne’ebe hanesan, ba sidadaun ne’ebe sei sai nudar votantes iha eleisaun 2012, Xefe Estadu mos hato’o ninia apelu atu sira bele tetu didiak tuir sira nia konsiensia rasik, molok sira fo sira nia votus iha eleisaun ne’e.

Vizita Xefi Estadu nian iha sub distritu rua ne’e la’o ho susesu tamba hetan partisipasaun maksimu husi komunidade sira. Iha vizita ne’e, Gabinete Prezidensia mos oferese apoiu mantas, roupa labarik nian, nomos ekipamentus desportu ba populasaun sira.

Tuir ajenda ne’ebe iha, molok fila hikas mai kapital Dili, Prezidente hamutuk ho ninia komitivas sei hakat-an mos ba sub distritu Nitibe no Pante Makasar hodi hasoru malu ho komunidade sira iha area rua ne’e.