Radio, online – Nasaun Timor Leste hakerek tan istoria osan mean iha Komando F-FDTL, husi Unidade engenaria hamutuk soldadu 12 sei ba partisipa iha forsa manutensaun da paz ONU, iha Libanon (medio oriente) durante tinan ida.
Serimonia despedida ne’e halao iha Palacio Prezidenti Aitarak lara, Dili (14/7). Tuir Horta forsa 12 ne’e fulan ne’en iha Portugal hodi halo treinamentu adaptasaun ho Forsas Armadas Portugal, hafoin aranka ba ba Libanon.
Nudar nasaun foin ukun a’an no nasaun kiik, oportunidade bo’ot tebes ba Timor Leste atu hakat ba oin. Xefi Estadu husu ba membru F-FDTL nain 12 “Imi ba ne’e lori bandeira nasional no TL nia naran, hodi reprezenta embaisador Timor Leste iha Libanon.
Tanba ne’e, premeiru tenki hatudu ba forsas armadas Portugal, servisu ho professional no disiplina makas, hodi foti dignidade Timor Leste. Hamutuk ho Portugal foti TL nia naran iha mundu internasional.
Hatutan Xefe Estadu. Libanon nudar nasaun ida ne’ebe ki’ik liu iha mundu, maibe nia povu barak liu mak hela namkari mundu rai klaran. Nasaun Libanon iha riku teb-tebes, maibe tanba realidae no stratejia politik halo sira sai vitima teb-tebes tanba jeografia.
Disiplina istoria Libanon hatudu katak nasaun ne’e hasoru konflitu ho violensia iha tinan barak nia laran, halo sidade hetan destroidu maka’as hanesan TL iha tinan 1999. Povu Libanon iha esperitu badinas hodi servisu makaas ho dinamiku, iha tempu badak nia laran deit, konsege hari’i (konstrui) fali nasaun.
Ba futuru, sei prepara F-FDTL ho diak liutan hodi servisu hamutuk Indonesia, no nasaun sira iha membru ASEAN, hodi partisipa iha forsa manutensaun da paz ONU nian. Alende ne’e sei servisu hamutuk mos ho forsas armada naval Japaun, Estadu Unidus da Amerika, Australia, hodi dezemvolve forsa armada naval, hodi kontrola teritorio.
Iha fatin hanesan, Tanente Engenaria, Jose Antonio Nunes da Costa, ne’ebe asumi responsabilidade hanesan komandante F-FDTL ba ekipa manutensaun da Paz iha Libanon hateten “Ami sei tene a’as no kaer metin mensajem Prezedenti Horta, atu hatudu ba mundu katak, TL bele. Tamba ne’e hakarak teb-tebes aprovoeita oportunidade ne’e ho didiak no liu husi servisu hamutuk ho Portugal, sei foti TL ho Portugal nian naran iha mundu,”dehan Nunes.
Partisipa iha seremonia ne’e, Premeiru Ministru Xanana, Major Jeneral Taur Matan Ruak, Komandante Supremu Forsa Armada Thailandia Sonkitti Jaggabatara, Embaisador Portugal, konsuladu TL iha Libanon, no korpu diplomatiku.
Discussion about this post