Radio, online – Prevene hahalok Korupsaun, Kolusaun no Nepotizmu (KKN), Komisaun Anti Korupsaun realiza seminariu ho lider komunitariu husi Distritu Dili.
Seminariu ne’e halao iha Fundasaun Oriente (8/7) foin lalais ne’e. Adjunto KAK José Ave de Jesus das Neves hatete, liu husi workshop ne’e bele hato’o ba publiku oinsa prevene KKN.
“Prinsipal mak lider komunitariu sira ne’ebe besik liu ho komunidade bele hatene no akompanha ba projetu sira mak halo sai kontrolasaun diak ba lalaok KKN,”dehan Jose Neves.
Tuir Neves kondisaun sosial no politika ba projetu ruma mak halao iha distritu laran ka suku laran presiza tebes lider komunitairu sira nia koinesementu. Ho ko’operasaun mak diak sai indikador hamenus dalan ba KKN.
“Xefi suku sira mak sai nain ba projeitu ne’ebe mak halao husi kompanha sira. Sira bele hatene koinesementu baziku konaba implementasaun projeitus sira ne’e,” Jose Neves esklarese. Adjunto komisariu KAK akresenta liu tan, lider komunitariu sira bele detekta no prevene korupsaun
Lia nain Suku Bidau, Martinho Rodrigues Pereira dehan, workshop ne’e importante ba lider Komunitariu, tamba aumenta koinesementu konaba oinsa mak hare’e servisu dezenvolvimentu iha suku laran ho diak no kualidade.
Martinho hatutan, durante ne’e projetu mak halao iha suku laran lao duni maibe kualidade mak laiha. Hanesan iha Dili laran taka estrada koak ne’ebe laiha kualidade. Estrada fatin koak ida taka dala tolu iha tinan ida. Ne’e mos hahalok partense ba Korupsaun ba povu nia osan.
“Ami rona tiha esplikasaun ne’e halo ami iha responsabilidade bo’ot ba hamutuk ho KAK hodi kontribui kombate Korupsaun Iha Timor Leste,”Martinho komenta .
Discussion about this post