Radio, online – Sekertario Jeral Partido Demokrata Sosial (PSD) Marito Magno hahu halo politika promesa ba povu iha Sub-Distritu Alas, suku Taitudak hodi hatete, iha 2012 mai mak PSD manan hodi forma governu, sei selu salariu ba Funsionairu Publiku (FP) dala rua iha fulan ida nia laran.
Tuir Sekertario Jeral PSD ne’e katak, Timor Leste ninia orsamentu sufsiente atu selu FP nia salariu dala rua, wainhira PSD konsege halakon KKN iha nasaun ne’e. Tuir Magno lolos ne’e bele implementa, maibe KKN mak buras liu. Kestaun ne’e hato’o husi Magno liu husi konsolidasaun PSD iha Sub-distritu Alas, suku Taitudak Sesta, (10/6).
”Ita nia nasaun ne’e riku soke maneija mak tenki diak no transparansia. PSD manan sei implementa salariu simu dala rua. Katuas-ferik ne’ebe agora simu osan ne’e, planu PSD nian,”Magno konfesa.
Iha eleisaun 2012 PSD sei lao mesak la halo aliansa, tanba PSD konfia nian-an. Iha aliansa tuir PSD nia esperensia susar tebes atu halao programa iha periodu nia laran, tuir politika partido nian.
“PSD iha eleisaun Legislativu, hau fiar katak PSD sei hetan kadeira 12 iha parlamentu nasional,”dehan Magno ho fiar an.
Iha okaziaun ne’e Magno husu ba povu iha Alas atu fo fiar liu husi votasaun ba PSD, tanba dalan ida ne’e mak PSD iha politika forte hodi defende povu nia intereses no atende povu nia susar no terus. PSD hakribi violensia no sei la tolera ba violensia iha nasaun ne’e.
“Ami sei halo buat diak ba povu iha nasaun ne’e wainhira PSD nia kadeira aumenta iha PN,”Magno komenta liutan.
Discussion about this post