Idelta Husu Prizioneiru Hakribi Violensia

Radio, online – Sekertaria  Estado Promosaun Igualdade Idelta Maria Rodrigues husu ba prizioneirus sira mak kumpri lei hela iha prizaun Becora katak, wainhira fila ba uma tenki hakribi violensia hodi moris iha dame nia laran.

Idelta Maria Rodrigues kasu lia hirak ne’e iha prizaun Becora Segunda, (6/6) wainhira partisipa abertura programa formasaun ba prizioneirus sira hgo tema “kontrola hahalok hirus”.

Programa ne’e realiza tanba servisu hamutuk SEPI-MJ ho ajensia ONU-UNFPA ne’ebe hetan suporta husi programa MDGF. Fundus husi governu Espanyola.

Idelta hatutan, programa ida ne’e importante teb-tebes ba prizioneirus sira, tanba wainhira sidadaun ida halo sala estadu hadok-an husi ninia povu, maibe estadu iha obrigasaun fo atensaun nafatin hodi buka apoia husi ajensia ONU nian fo formasaun, atu nune’e loron ida sai husi prizaun sei la halo tan krimi.

“Hau esforsu formasaun ne’e tenki kontinua, tanba hau fiar katak prizioneirus sira fila ba uma sei moris iha familia nia laran. Hau presta ne’e tanba dalab ida mos hodi halakon violensia iha uma laran,”Idelta esklarese.

Idelta mos husu ba prizioneirus nain 22  mak tuir formasaun maioria mane hotu hodi hatete, labele hanoin ho odiu wainhira fila husi priziaun ba iha uma laran kotinua halo krimi. Tanba imi iha familia hanesan fen ho oan. Hadomi malu ba hodi hatutan moris ne’e ho feliz. Ne’e mak objetivu lolos husi formasaun.

Reprezentante UNFPA Hong Chai  hatete, objetivu husi formasaun ida ne’e, hodi dezenvolve partisipantes sira nia abilidade atu kontrola hirus ne’ebe to’o ikus atu mai hamenus risku salan sira iha futuru oin mai, wainhira prizioneirus sira fila ba sira nia familia.

Durante tinan 2008, SEPI husu apoia UNFPA hodi implementa formasaun ne’e iha parte rua. Premeiru fo kursu ba guarda prizioneirus sira atu atende ema sira mak tama iha prizaun ne’e ho etika no konsedera hanesan umanu.

Iha parte segundu UNFPA nafatin fo formasaun ba prizioneirus sira wainhira sai husi prizaun hodi hakribi tiha violensia hodi sub-mete ba moris harmonia iha komunidade. Programa hanesan halao iha 2010 iha prizaun Gleno.