Radio, online – Servisu Tekniku Administrasaun Eleisoens (STAE) rekruta brigadista hamutuk 630 hodi reforsa servisu STAE nian iha prosesu eleisaun tomak. Funsionairu temporariu ne’e hahu husi fulan Fevereiru Julhu.
Asuntu dehan husi Adjuntu Diretor Geral STAE Elviro Moniz liu husi konferensia da emprensa iha STAE Kaikoli, Dili Kinta, (2/1).
Elviro hatutan, atu reforsa festa demokrasia ne’e lao ba oin ho susesu hahu dia 1 de Fevereiru STAE halo asina kontratu ba brigadista hamutuk 630, husi distritu 13, motorist hamutuk nain 34, ofisial logistik 91, ofisial edukasaun vontantes 13, ofisial informatika(IT) 130 ne’ebe sei halao servisu durante fulan 6 hahu iha 1 de Fevereiru 2012 to’o iha loron 31 fulan Jullu 2012.
Adjuntu STAE ne’e husu ba observador, media Nasional no Internasional nomos ba fiskais sira atu asesu ba prosesu tomak iha eleisaun tenki iha karta akreditasaun husi STAE. Tuir data kalendariu kampanha politika ba kandidatura prezidensial hahu dia 13 Fevereiru to’o 13 Marsu, durante fulan ida nia laran. Iha dia 17 de Marsu loron votasaun.
Iha dia 6 to’o iha loron 8 fulan Fevereiru STAE sei halao treinamentu ba iha brigadista sira iha distritu 13. Alende ne’e sei halao mos treinamentu ba iha parseiru STAE ninian hanesan media, PNTL, PDHJ, CAC, no observadores tuir kalendariu ne’ebe mak ESTAE prepara.
“Husu ba jornalista sira kada loron Kinta feira hodi bele divulga no akompaina nafatin informasaun husi aktividades hotu-hotu ne’ebe STAE halao hodi garantia eleisaun ne’ebe mak lao ho justu, livre transparensia no imparsialidade,”Elviro akresenta.
Discussion about this post