Radio, online – Aktual Vice Primeiru Ministru Jose Luis Guterres ‘Lugu’ hanesan mos kandidatu ba Prezidenti da Republika iha eleisaun ezekutivu nian. Iha kampanha Lugu sei tama sai odamatan hodi husu povu tomak nia apoiu.
“Hau fo obrigadu ba ema barak ne’ebe fo sira nia asinatura ba hau atu avansa ba oin. Ba oin hau nafatin tuku imi hotu nia odamatan hodi apoiu hau sai prezidenti atu lori nasaun ne’e ba oin,”dehan Lugu hafoin katak ba Tribunal Rekursu hodi rejistu.
Lugu ninia kandidatura ne’e hetan apoiu maka’as husi partido Frente Mudansa. Abel da Costa Freitas hanesan ekipa susesu ba kandidatu Lugu nian.
Iha oportunidade ne’e Lugu fo fiar ba ekipa susesu ne’ebe servisu maka’as tebes hodi rekoila dadus sira to’o hetan kriteria atu kandidatu katak, kandidatu tenki hetan asinatura ho foto kopia kartau eleitoral to’o 5000.
“Hau nia susesu iha imi ekipa sira nia liman no valor liu ba votantes sira ne’ebe mai husi partido hotu-hotu ne’ebe sei fo sira nia votus ba hau atu sai Prezidenti iha nasaun ne’e,”dehan Lugu ho konfiansa.
Tuir Tribunal Rekursu to’o ohin loron iha kandidatu 10 mak legal atu kompete iha eleisaun prezidensial fulan Marsu nia laran ne’e. Kandidatu hirak ne’e mak hanesan, Jose Ramos Horta, Taur Matan Ruak, Francisco Guterres Lu-olo, Rogerio Lobato, Jose Luis Guterres, Angelita Pires, Fernando Lasama de Araujo, Abilio de Araujo, Lucas da Costa no Prezidenti partido Monarkia Timor Leste.
Discussion about this post