Radio, online – Estudante no juventude Suku Saelari primeira vez halao seminar iha sira nia suku (SDK Primaria Katolika St.Antonio Saelari) ho Tópiku Papel Estudante No Juventude Ba Prosesu Desenvolvimentu, iha loron 30/12/2011.
Iha seminario ida ne’e koalia konaba oinsa estudante no juventude sira iha unidade hodi transforma suku saelari ba prosesu desenvolvimentu iha suku laran.
Lia hirak ne’e hato’o husi Membru Parlamentu Nasional, Cornelio Gama (L7) ne’ebe hanesan suku saelari nia emar, I sai orador ba estudante, juventude, lider komunitariu no komunidade iha suku Saelari.
“Ha’u husu ba juventude no estudante suku saelari atu labele hare malu matan la mos, maibe iha resposabilidade atu nune’e bele transforma ita nia suku saelari ba prosesu dezenvolvimentu ba oin, se prosesu dezenvolvimentu ita la halo ita hanesan ne’e hela deit, tamba ne’e ita tenki iha dezenvolvimentu unidade e progresu, katak hamrik hamutuk hodi servisu hamutuk” hateten L7.
Orador ne’e esplika liu tan katak, prosesu dezenvolvimentu atu funsiona ho diak ba futuru, premeiru Inan/Aman mak tenki Eduka oan sira, segundu Professor sira mak Eduka, terseiru Parlamentu, quartu Governu, quintu Tribunal. Iha palestra ne’e koalia mos kona ba istoria durante invajaun nasaun Indonesia no Portuges nia mai iha TL.
Wainhira remata seminariu ne’e L7 la haluha hato’o nia mensajen no parabens ba estudante no juventude suku saelari atu la bele haluha fo hanoin ba Inan/Aman no alin sira ne’ebe foin aprende atu nune’e bele banati tuir dalan ne’ebe estudante no juventude sira husik hela.
“Ha’u husu parabens ba estudante no juventude sira, tamba sira nia hanoin mak ohin loron realiza seminar ida ne’e, no ba futuru saida mak sira halo ba TL iha ita nia ukun rasik aan ida ne’e no saida mak sira fo hanoin ba inan-aman no alin sira ne’ebe foin aprende, ne’e hanesan buat ida que nunka akontese iha tempu Indonesia no portugues, maibe akontese tan sira iha kapasidade, pratatika, teoria, katak Timor oan mos iha ona kategoria atu bele hala’o progresu dezenvolvimentu ba future nasaun ida ne’e.
Ha’u kaer sagrada familia, tan ne’e hau husu sagrada familia ho promessa no reza atu aumenta diak liu tan estudante no juventude suku saelari nia kapasidade.
Iha parte seluk tuir Adão Barbosa hanesan mos orador ba seminar ida ne’e hatete progresu desevolmentu atu sai diak presija rekursu humanu katak ema hotu- hotu tenki tama eskola. Iha rai seluk obrigatoriu labarik sira tinan sei kiik tenki tama eskola, kiik liu mak nia akaba eskola primaria mos la problema, naran katak eskola i hantene hakerek no lé.
“Eskola ne’e dalan importante ba ema atu aprende tamba liu husi edukasaun mak ema hatene lé no hakerek, objetivu husi ukun an mak oinsa ita hasa’e kualidade ema timor oan nia vida husi kiak, mukit sai fali moris ida que diak oitoan no iha koñesementu iha area edukasaun”, dehan Barbosa.
Nu’udar saelari oan nia hateten, prosesu desenvolvimentu ne’e foka ba parte rua, fisiku no non-fisiku. Fisiku katak ita hare hetan intermus de halo uma, eskola hira mak ita halo tiha ona iha Timor Leste no mos iha saelari ne’e. Non-Fisiku katak ita la hare hetan, ita la bele sura, la bele kuantifika, desenvolvimentu ne’ebe abstrak, maibe lao ba oin.
Iha sorin seluk tuir estudante faculdade Engenaria UNTL, Idelfonso Cardoso hafoin de seminar hateten, nia senti orgulhu teb-tebes ho seminar ne’ebe fahe husi orador sira, husi parte oin-oin tamba bele aumenta sira nia kapasidade no konesimentu.
“Ha’u senti orgulhu teb-tebes ho palestra ne’ebe ohin fahe husi orador membru parlamentu, governu, senorista, sociedade civil, no igreja tamba bele aumenta ha’u nia kapasidade no konesimentu liu husi seminar ida ne’e” hateten Cardoso.
Iha seminar ne’e hetan partisipante masimu husi lider komunitariu, inan/aman, estudante no juventude iha suku saelari.
Discussion about this post