Radio, online – Instituisaun estadu, Polisia Nasional Timor Leste (PNTL) hamutuk ho United Nations Police (UNPol) iha 2012 halao planu ezersisiu bo’ot hodi hasoru eleisaun geral. Iha ezersisu ne’e sei involve mos F-FDTL no FSI.
Kestaun ne’e hato’o liu husi konferensia da emprensa ne’ebe halao husi Komandante Geral PNTL Longuinhos Monteiro hamutuk ho Komisariu UNPol Juis Carilho halao Tersa, (13/12) iha Quartel Geral PNTL Kaikoli, Dili.
Komandante PNTL Longuinhos Monteiro dehan, atu responde ba eleisaun geral 2012, PNTL – UNPol dezenvolve tiha ona planu kapasitasaun ne’ebe koinesidu hanesan Planu Dezenvolvimentu Konjunta. Iha planu ne’e foka liu ba area lejislasaun, formasaun, administrasaun, disiplina no operasaun.
Tuir Longuinhos ezersisiu konjunta ne’ebe atu halao ne’e iha fulan Janeiro to’o Dezembru, kuaze iha tinan tomak nia laran. Ezersisiu ne’e hodi kontrola prosesu husi kampanha politiku husi eleisaun Prezidensial to’o eleisaun lejislativu hodi forma governu.
“Ami sei halao buat hotu ne’ebe diak ba sidadaun sira atu livre hodi ba vota, tuir nasaun nia prinsipiu demokratikamente,”Longuinhos konfesa.
Komandante ho aifunan rua ne’e hatutan, liu husi ezersisiu konjunta sei monta seguransa ba fatin hotu iha sentru votasaun ho kuantidade maximu, hodi kontrola seguransa lao ho diak liutan.
Husu konaba regional ne’ebe atu hamosu instabilidade, Komandante Longuinhos fo sai katak, numeru krimi iha tinan ida ne’e tun kompara ho tinan kotuk. Krimi oras ne’e mak domina tuir registu iha polisia, violensia domestika.
“Iha ne’e hau labele temi regional ne’ebe mak tensaun atu hamosu instabilidade liliu ba prosesu eleisaun nian, tanba ne’e segredu polisia nian,”Longuinhos akresenta.
Iha fatin hanesan Komisairu UNPol Luis Carilho hateten, ezersisiu konjuntu hanesan strategi importante tebes hodi hasoru eleisaun geral 2012 atu garante paz no estabilidade iha nasaun ne’e.
“Ezersisiu hanesan ne’e misaun ONU nian iha TL liu husi UNPol atu fo garante paz no stabilidade iha nasaun ne’e, antes ONU nia misaun remata. ONU nia misaun atu remata tenki entrega ba Timor oan ho paz, ne’e mak ONU nia misaun,”Carilho komenta.
Discussion about this post