Aileu –Knaar no responsabilidade nu’udar prezidente iha organizasaun no edukador la’os mane de’it maibé feto bele, realidade hatudu husi feto potensiál Beatriz de Deus Torrezão, Orijem Munisípiu Aileu ne’ebé asumi kna’ar iha area rua nu’udar manorin no mós prezidente iha Asosiasaun.
Beti naran estimada husi Beatriz, oan daruak husi Domingos Torrezão no Ângela Sousa de Deus, husi familia liu-liu parseiru nia suporta halo Beti bele explora ninia kapasidade ne’ebé iha hodi servisu hanesan Prezidente iha Asosiasaun Feto nia Asaun ba Dezenvolvimentu (FADA) no sai mós hanesan manorin lian Ingles iha eskola 30 Ciclo Colegio São Pedro São Paulo iha Aileu husi tinan 2001 to’o ohin loron, nu’udar mós Dosente iha Universidade Cristal Polo, aliende ne’e asumi knaar hanesan mós Presidente iha Asosiasaun FADA hahú husi 2021 to’o ohin.
“Durante halao kna’ar nu’udar manorin envolve mós an iha Asosiasaun FADA hodi fahe informasaun ba komunidade sira iha Aileu no kapasita maluk feto sira no hasa’e feto sira-nia kapasidade atu bele envolve aan iha vida politíka inklui mós oinsa atu bele ko’alia iha publiku” hateten Beti ba jornalista via telefone.
Maske halao hela nia nia kna’ar Beti lakoi lakon oportunidade nune’e iha tinan 2012 Beti kontinua estudu iha Universitáriu Pegeri Adibuana Surabaya no remata iha tinan 2014, husi kursu Teknologi Pendidikan, hafoin remata kontinua servisu kedas iha Asosiasaun FADA durante tinan 7 no iha 2021 asumi kna’ar nu’udar presidente iha FADA, iha asosiasaun ne’e servisu hamutuk ho organizasun seluk hanesan Plan Internasionál iha Timor-Leste, World Vision Timor-Leste no SEI hodi hakbiit feto nia partisipasaun iha setór hotu ba dezenvolvimentu iha baze.
Ho nune’e feto ho idade 46 ne’e apresia ho feto maluk sira seluk nia envolvimentu iha organizasaun tanba feto sira bele aprende barak kona ba maneira hamenus violénsia no iha koñesimentu di’ak hodi brani ko’alia iha fatin públiku.
“Ha’u apresia tebes wainhira iha envolvementu feto sira iha asosiasaun no kapasita komunidade sira kona-ba oinsá hamenus violénsia no saude reprodutiva nune’e apoiu husi mane tanba feto nia papel importante tebes iha familia, komunidade no iha kualkér atividade no realidade agora dadaun feto barani kompete mós ho mane sira” dehan nia.
Antes ne’e Beti iha esperensia servisu hamutuk ho UNAMET iha tinan 1999 hanesan tradutora no aproveita tempu hodi tuir kursu iha lian ingles, ninia esperiénsia ne’e hodi fó oportunidade ba nia hodi sai manorin ba lian ingles iha Colegio São Pedro São Paul Aileu no Dosente iha Universidade Cristal Polo.
Inan husi oan nain 4 ne’e halao kna’ar nu’udar presidente iha asosiasaun no manorin iha dezafiu ne’ebé nia hasoru mak oinsá fahe tenpu ba atividade ne’ebé nia halo, maibé dezafiu hirak ne’e sempre iha solusaun tanba hetan suporta bot husi familia liu-liu ninia parseiru rasik iha iha kualkér atividade.
Feto potensiál ne’e mós husik hela mensajen ba feto maluk sira atu kolabora hamutuk moris ha sosiedade hodi valoriza feto nia servisu, liuliu suporta feto maluk hodi tuir formasaun no kapasita an atu bele envolve iha organizasaun sira labele hein katak mane mak lidera maibé feto ho mane iha diretu hanesan. Liga ba K-RDTL artigu 17 (Igualdade ba feto no Mane) Feto ho mane iha Direitu no obrigasaun hanesan iha moris familia, kultural, sosiál, ekonómiku no politíku nia laran.
Reportagem : Julianti de J. Saldanha (Partisipante training GSR)
Editora : Eva Flor
Discussion about this post