Vqq(Bibileo)–Sefe Suku Bibileo Eleito, Postu Administrativu Viqueque Vila, Munisipiu Viqueque, Moises Acacio promete iha inisiu mandatu sei fó prioridade mós ba Idozu no Defisiénsia Sira nia Direitu ba Subsidiu ne’ebé durante rejistu maibé naran la sai.
Foto official Moises Acacio Sefe suku Eleito SUku Bibileo
“Durante ne’e ha’u akompanha no husu tuir komunidade, liuliu ema ho difisiénsia katak sira barak mak seidauk hetan direitu ba subsidiu, maske naran hatama ona maibe to’o ohin loron la simu subsidiu, nune’e iha inisiu tinan 2024 sei halibur komunidade nia dokumentus hodi kordeana ho MSSI hodi ba reativa” dehan Acacio ba Jornalista Radio Liberdade liuhusi telefone.
Acacio mós sei halo programa primeiru hafoin tomada de pose iha loron 28/11 tinan ne’e mak sei realiza uluk programa Hametin Kultura hanesan Abut Suku Bibileo nian. Segundu, Hadia Sistema Atendimentu ho Efisien no Efetivu ba maluk karimbu nain sira.
Lideransa komunitariu ne’e sei halo kordenasaun ho parte relevante sira hodi haree ba mota ne’ebé sempre estraga komunidade Bibileo nia uma, aihori no toos sira.
“Programa seluk ne’ebé ha’u sei halo mak kordena ho MOP ou IGE hodi Normaliza Mota We Tuku ne’ebé durante tinan 2 Komunidade Bibileo Hasoru iha fulan Maio no Junho wainhira udan mota tun hodi sobu rai” Lideransa Eleito ne’e Informa.
Nia reforsa durante ne’e problema sosial barak mak akontese maibé iha tinan 2024 ba oin sei hamutuk ho komunidade hodi dezenvolve mós produsaun agrikola sira.
Tuir dadus suku Bibileo iha Aldeia 8, ho total populasaun hamutuk 3228, Feto 1589, Mane 1639, uma kain hamutuk 711, enkuantu idozu ne’ebé seidauk hetan subside kuaze 70, no ema ho difisiénsia nain 5.
Discussion about this post