Radio, online – Partido istoriku Frente Revolusionairu Timor Leste Independete (FRETILIN), halao kampanha enseramentu ba kandidatu Prezidenti partido Francisco Guterres Lu-Olo ho Sekertariu Jeral Mari Alkatiri.
Iha kampanha ne’e kampo demokrasia nakonu ho militantes Fretilin. Iha dia 20 de Agostu 2011, partido Fretilin mak hatur demokrasia hodi hili hili direitamente husi militantes ba Prezidenti ho Sekretariu Jeral ba partido ne’ebe kaer prinsipiu ukun-an ne’e.
Antes atu hahu diskursu husi Kandidaru Lu-Olo ho Mari, Ko’ordenador Ekipa Susesu Fretilin Florentina Smith ba radioliberdadedili online hateten, kampana Fretilin halao iha Distritu Dili hanesan hatutan husi kampana ne’ebe halao iha Distritu sira hotu. Dili hanesan kampana enseramentu.
Florentina hatutan, hare husi militantes mak barak ne’e hatudu katak, povu sira iha Fretilin sei nafatin fo fiar ba Lu-Olo ho Mari kontinua lidera partido povu maubere nian ne’e.
Iha kampana ne’e kandidatu nain rua sei koalia liu konaba komprimisu politiku ba militantes ne’ebe trasa tiha ona iha manual politiku Fretilin ninian.
“Ami fiar katak ho militantes Fretilin nian mak barak hanesan ne’e vitoria iha eleisaun jeral 2012 Fretilin sei manan,”Florentina afirma.
Iha palestra kandidatu Prezidenti partido Fretilin Lu-Olo hateten, Fretilin hamrik nanis ona ho povu no moris nanis ona ho povu, iha tempu susar no agora. Fretilin garante katak demokrasia ne’e metin tanba Fretilin nia eleisuan direita ba ninia kuadrus politiku.
Lu-Olo relembra katak, iha 2006 kuandu krizi mosu Fretilin mak kria stabilidade ba paiz ne’e no fo korazen ba povu hodi tane metin nasaun ne’e hodi hakribi violensia.
“Hau ho Mari komprimisu ba povu ida ne’e katak, Fretilin manan sei hadia povu nia moris tuir prinsipiu partido ne’e hari iha 75,” Lu-Olo akresenta.
Nune’e mos kandidatu Sekertario Jeral Mari Alkatiri hatete, Fretilin hakribi ba moras aat KKN, ne’e duni Fretilin mak ukun sei lori ema sira iha AMP nia ukun ne’e ba tribunal. Tribunal mak disidi.
“Ami rua kamarada Lu hamrik metin iha Fretilin hodi hamutuk ho militantes garante vitoria iha eleisaun jeral tinan oin mai. Hau husu ba militante hotu iha 20 de Agostu hakat ba sentru votasaun hodi determina Fretilin nia futuru ho ami nia komprimisu todan ne’e,” Alkatiri apela.
Discussion about this post