Radio Online – Estudante Universidade Nasional Timor Leste (UNTL) lakoi uza bis 3 ne’ebe sosa ba UNTL hodi tula estudante fakuldade Agrikultura ne’ebe halo estudu iha Hera. Alende ne’e mos iha husi Universidade lakoi uza bis 3 ne’e ho Pic Up 2 tanba kareta hirak ne’e kareta uzadu ona alias segundu maun (tangan kedua).
Kestaun ne’e hato’o husi Vice Reitor UNTL Miguel Maia ba jornalista Tersa, (16/8) iha Salaun UNTL Liceu wainhira halo gladi bersih ba estudante sira 609 ne’ebe atu graduasaun.
Vice Reitor UNTL ne’e hatutan, konaba transporte ne’ebe Ministerio Edukasaun sosa ba estudante UNTL la tuir kriteria. Sosa fali kareta uzadu. Kareta hirak ne’e agora tama ona iha prosesu investigasaun.
Tuir Miguel Bis ida agora para hela iha UNTL, bis 3 ho pic up 2 sei ba tau hela iha Ministeiru Edukasaun Vila Verde hodi hein prosesu investigasaun
“Ami seidauk bele uza kareta ne’e hodi tula estudante sira tanba bis 3 ne’e sosa la tuir kriteria. Ami lakoi atu kulpa iha loron ikus mai,”Miguel komenta.
Iha parte seluk Prezidenti Komisaun F asuntu edukasaun Virgilio Maria Diaz Marcal iha uma fukun Parlamentu Nasional hateten, komisaun F lamenta no ejije ba ME atu halo investigasaun ba kareta sira mak sosa ba UNTL la tuir kriteria, tanba kareta ne’e uzadu ona.
“Tanba saida mak seidauk halo investigasaun, Ita labele husik nune’e deit. Osan hirak mak sosa ne’e laos ME nia osan maibe ne’e povu nia osan,”nia lamenta.
Razaun sosa kareta husi ME ba UNTL tanba estudantes UNTL mak estudu iha Hera, wainhira fila ba mai Dili sae kareta publiku sempre hetan dezastre. Durante ne’e estudante kuaze nain 5 mak mate tanba asidente kareta baku fila. Bis 3 ne’e atu fasilita ba estudante nia aktividades estudus.
Estudante UNTL Cezario Plasido husu ba Inspektor Jeral atu investiga ba Ministeiru da Edukasaun hodi osan sosa bis 3 ne’ebe la tama kategoria ne’e. Bis 3 ne’e seidak uza, bis ida para hela iha UNTL nia 2 seluk para hela iha ME nia edifisiu.
“Ami sei la sae bis ne’e tanba bis ne’e sosa ho osan bo’ot. Sosa bis foun laos bis tuan. See mak manan tender sosa bis 3 no Pic up 2 ne’e tenki responsabilidade. Hahalok ne’e mak dehan KKN, halo manipulasaun,”Secario kestioan.
Discussion about this post