Radio, online – Major General F-FDTL Taur Matan Ruak husu ba foin sa’e sira presiza hatene konaba istoria Forsa Armada Libertasaun Nasional Timor Leste (FALINTIL) nian durante 24 anos hasoru okupasaun militar Indonezia iha teritoriu ida ne’e.
Xefi Estado Major General Taur Matan Ruak kasu lia hirak ne’e wainhira partisipa hodi fahe istoria no esperensia FALINTIL nian durante funu laran ba estudante Universidade Nasional Timor Loro Sa’e, Fakuldade Siensia no Politika Segunda, (15/8) iha UNTL Kaikoli, Dili.
Taur hateten katak, joven sira presiza tebes atu hatene istoria luta 24 anos nebe halo hasoru inimigu. Istoria ne’e hanesan referensia ba estudante no sidadaun hotu, tamba ne’e joven sira tenke hatene duni istoria. Taur hatutan, husi istoria naruk ne’e mak ohin loron Timor Leste hetan ukun-an ne’e.
“Hau senti kontenti tebes wainhira estudante konvida hau atu fahe esperensai luta ba sira tamba estudante presiza tebes atu hatene,” Taur apresia.
Iha fatin hanesan Vice Dekanu Faspol Zacarias F. da Costa, objetivo konvida Major General Taur Matan Ruak ne’e tamba estudante atu partsiap iha loron FALINTIL nebe’e sei monu iha 20 de Agostu estudante bele hatene’e papel FALINTIL husi luta hasoru inimigo iha tempo pasado.
“Fahe esperensia luta nian ba estudante sira hodi nune’e ita hotu hola parte iha loron FALINTIL nian ne’ebe sei komemora iha 20 de Agostu mai ne’e,”nia komenta.
FALINTIL hanesan forsa libertasaun nasional ne’ebe forma iha tempo funu nia laran hodi halo funu hasoru invazaun militar Indonezia, durante 24 anos. Kay Rala Xanana Gusmao mak lidera FALINTIL to’o funu ne’e remata, hanesan Komandante Supremu da Gerilya.
Discussion about this post