Timor-Leste iha feto potensiál barak. Perfíl ida ne’ebé aumenta tan lista feto potensiál ne’e mak Aquina Cardoso dos Santos, tinan 35. La-ho kapitál ne’ebé boot, maibé ho determinasaun no vontade atu halo mudansa oioin iha Timor-Leste, Aquina ohin-loron sai nu’udar Diretora ba Kompañia ALDIAMOND SHINE, kompañia ida ne’ebé nia harii iha 2022. To’o iha 2023, retornu finanseiru ne’ebé Aquina hetan hosi produtu sira ne’e kuaze atinji ona $20,000.
To’o ohin-loron produtu sira ne’e esporta ona ba rai seluk hanesan Austrália, Indonézia, Portugál, no Gran Bretañia.
Bainhira husu kona-ba retornu hosi merkadoria ba produtu sira ne’e, Aquina hatán: “Kona-ba lukru ne’ebé ha’u hetan, ha’u la sura kada fulan ka semana maibé ha’u sura de’it botol ne’ebé distribui ona mak 1,800,” Aquina esplika”
Iha merkadoria, mina aloe vera kada bótil fa’an ba $10. Aleinde mina aloe vera, Aquina mós prodús mina nuu virjen no sabaun. Aquina rekoñese katak hahú kompañia ne’e la’ós buat ida fásil, tanba nia esperimenta negósiu oioin molok hetan ninian forma agora. Nune’e indústria família ne’e to’o ohin loron fó ona empregu ba ema hamutuk na’in 39, ne’ebé kompostu hosi dealer 29 no distributór nain 10.
Iha 2016, nu’udar ezemplu, Aquina envolve iha produsaun bebida susu-been (milk shake) no Galaxy ice cream, ne’ebé Aquina ho membru família fa’an iha tasi ibun no iha basar kalan nian (night market) iha Dili.
Aleinde ida-ne’e, iha 2017, tan abilitasaun literaria iha Ekonomia hosi Universidade Atma Jaya Jogyakarta, nia konsege sai nu’udar ajente ida iha institutu peskiza nian, Insight. Maibé depois ida-ne’e, Aquina fila hikas ba Lautén hodi servisu ba Fundasaun Fundamor iha 2018.
Depois nia hahú loke mós Resto Café iha IOB Fomentu nia oin iha 2019 to’o 2020. Liuhosi ninian konvivénsia, ikus-mai nia mós rekrutada hodi hanorin matéria Ekonomia iha IOB hosi 2019 to’o 2020.
Depois iha 2022, aleinde jere ninian kompañia, Aquina uza mós tempu hodi hanorin matéria ekonomia indústria mídia nian iha Departamentu Komunikasaun Sosiál iha Universidade Oriental Timor-Lorosa’e (UNITAL).
Apezárde atinjimentu sira ne’e, Aquina infrenta mós dezafiu balu, hanesan espasu ba negósiu, produtu ba mina nuu no ai-funan balu ne’ebé Aquina presiza hetan hosi Munisípiu Lautem no Aileu. Aldiamond Shine oras ne’e rejista ona iha SERVE no kada fulan selu impostu ba Estadu.
Ba feto sira seluk ne’ebé hakarak atu hakat tuir Aquina ninian ain-fatin, Aquina hameno atu la bele moe hahú ho buat ki’ik tanba hosi buat ki’ik, ne’ebé hala’o ho laran no neon, sei kontibui ba diferensa ne’ebé boot iha Timor-Leste.
Reportajen: Ekipa Formadus RSG (Grp 1)
Editora: Desy Reis & João da S. Sarmento
Discussion about this post