DILI – Negosiante Kampung Baru hirus ho hahalok Autoridade Munisipiu Dili ne’ebé mak la fó fatin ba negosiante sira halo aktividade negosiu iha dalan ninin.
Tuir negosiante Joana, durante ne’e sira halo aktividade nu’udár vida negosiante no sira preokupa ba hahalok autoridade seguransa Munisipiu Dili ne’ebé estraga sira nia sasán no duni sira.
“Ami halo negosiu iha fatin ne’e husi dadér to’o kalan, maibe seguransa sira nafatin la autoriza ami atu halo negosiu iha fatin refere, ida ne’e sai hanesan preokupasaun mai ami negosiante sira atu halo negosiu tanba husi negosiu mak ami bele hetan rendimentu hodi sustenta ami nia oan sira ba eskola no nesesidade loron-loron,” dehan Joana ba jornalista Radio Liberdade iha Kampung Baru, Kuarta Feira (17/08/22).
“Ami, povo, lori ida ne’e mak dudu ami nia oan sira ba escola tanba ami nia oan balu SMP [Ensino Báziku], SMA [Ensinu Sekundáriu] no balu Universidade, atu nune’e bele aumenta sira nia kapasidade hodi muda ami nia moris hanesan negosiante ambulante,” Joana hatutan.
Negosiante ne’e mós afirma katak rendimentu kada loron ne’ebé mak sira hetan $20, maibé durante ne’e la to’o $20 halo sira sente triste.
“Rendimentu kada loron antes ne’e ami hetan $20, maibé tanba autoridade munisipal la autoriza ami halo negosiu, entaun agora ami la fa’an, ami nia produtu balun sai dodok, entaun ami nia rendimentu la hanesan babain no dalaruma fundus mós la iha, ida ne’e mak halo ha’u sente triste hodi hamonu ha’u nia matan been, ami nia moris mak hanesan ne’e, se ami la halo negósiu ida ne’e oinsa ami atu selu ami nia oan sira nia eskola,” Joana hateten.
Nia mós husu ba governu atu oferese fatin ba sira hodi halo negósiu.
“Antes ne’e ami rejistu ona iha Golgota Mall no simu ona númeru, maibé to’o agora seidauk hetan resposta, ne’ebé husu ba Primeiru Ministru Taur Matan Ruak no Prezidente Repúblika Jose Ramos Horta atu rezolve ami nia preokupasaun hirak ne’e,” nia husu.
Iha sorin seluk, Xefi Jestaun Merkadu, Joaquim Alves B. Matos Belo hatete sira la autoriza negosiante halo negosiu iha fatin refere tamba bazea ba dekretu lei husi Governu.
“Bazea ba Dekretu Lei 33/2018, 27 de Agusto, Parlamentu aprova iha 2008, katak fatin trotoar leten, estrada laran, la autoriza atu fa’an, ida ne’e orden husi superior sira hanesan Prezidente Autoridade Munisipiu Dili, Diretór to’o Chefe Departamentu ,” katak nia.
Nia hateten sira avizu bebeik ona ba negosiante sira atu labele fa’an iha fatin refere, maibé sira nafatin halo negósiu iha fatin sira neee.
Nia hateten sira avizu bebeik ona ba negosiante sira atu labele faan iha fatin refere, maibé sira nafatin halo negsiu iha fatin sira neee.
Discussion about this post