Radio, online – Forum ONG Timor-Leste (FONGTIL), hare ba eleisaun lao ho susesu rezultadu povu fo direitu ba Partido politiku (parpol) hat hanesan CNRT, FRETILIN, PD no Frente Mudansa tama iha uma fukun PN. Ho ida ne’e FONGTIL kongratula ba povu fo konstribuisaun maka’as ba prosesu demokrasia no partisipasaun partido politiku.
Asuntu ne’e hato’o husi Prezidenti Konseilho FOGNTIL, Justino da Silva liu husi preskonfrensia iha salun FONGTIL Kaikoli, Dili (12/7).
Konseilho FONGTIL hatutan, “ami hakarak kongratula povu TL laran tomak partido politikus sira ho konsiensia no maturidade politika priense prosesu demokrasia ne’e ho ambiente paz, estabilidade, livre no trasparansia nia laran,”dehan Justino.
Iha biban ne’e, FONGTIL hato’o mos kongratulasaun ba ONG Nasional, no internasional ne’ebe mak serbisu maka’as ba edukasaun sivika no mos observador nasional durante prose kampanha eleitoral to’o prosesu elisaun ne’ebe lao diak.
Tuir Forum ONG ne’e dehan, iha eleisaun hatudu laiha partido ida mak manan ho votus maioria atu bele priense kadeira parlamentu no forma V governu kostitusional ho ida ne’e hatudu katak sei akontese kolegasaun entre partido sira.
Tamba ne’e FONGTIL ho tane as ba paz no estabilidade rekomenda ba partido politiku sira ne’ebe hetan iha Parlamentu Nasional atu toma desizaun ba koligasaun ho respeito bo’ot ba situasaun paz no estabilidade ne’ebe povo hatudu ona durante kampanha.
FONGTIL fiar ba lideres partido sira atu iha hanoin ba futuru nasaun ne’e nain. Tamba see Timor oan garante paz no estabilidades ONU tinan ne’e remata misaun mos hotu ona.
“Ami husu lideransa politika, veteranus, jerasaun tuan ka mata dalan durante rezistensia atu hatudu pratika nune’e foinsae sira bele hatene prense ukun rasik-an diak liutan,”Justino komenta.
Ikus lius FONGTIL husu mos ba partido Politiku ne’ebe hetan asentu iha PN wainhira forma governu tenke realiza plano programa sira ne’ebe promesa ona ba publiko liu husi kampaina eleitoral.
Discussion about this post