Radio, online – Major General Lere Anan Timor ho firmeza hodi hateten lei la fo dalan ba grupo Petisionairu ne’ebe lidera husi Gastao Salsinha Cs ejiji estatuta ba estadu.
“Sira (petisionairu) la iha ona direito tamba sira halo ona akordo ho governu tamba ne’e sira lalika ke’e fila fali asunto ne’e tamba hanesan ema mate ne’e mate ona labele ke’e fila fali,” dehan Lere Anan Timor ba jornalista iha nia servisu fatin Kuarta, (12/10)
Major General ne’ebe foin troka Taur Matan Ruak ne’e hatutan, grupo petisionairu laiha ona direito atu husu estatutu ba Guverno tamba petisionairu halo akordo ona ho Eis Major General Taur Matan Ruak iha tinan. Iha akordu ne’e petisionairu sira ba moris vida sivil ona, ne’ebe simu subsidiu husi governu.
“Ami ho petisionairu sira hare malu diak, tamba ne’e ami lapresiza halo dialogu ho sira. Governu mak halo dialogu ho sira tamba governu mak halo promesa bar barak , maibe laiha rejultado. Hau husu governu tenke esplika didia ba Povo tamba sira halo ona promesa barak katak lori povo sai husi mukit no kiak,”Lere konfesa.
Prezidenti da Republika Jose Ramos Horta foin lalais ne’e hateten, petisionairu nia direitu governu rezolve ona, tamba halo akordo hodi petisionairu sira simu osan hodi muda ba vida sivil.
Lere La Konkorda CPD-RDTL akuza Filomeno Paixao
Iha fatin hanesan, Major General Lere Anan Timor la konkorda no la simu akuzasaun husi grupo CPD-RDTL hodi hatete Brigadeiru General Filomeno Paixao hanesan tradior ne’ebe iha resistensia rende ho nia soldadu no kilat barak ba inimugu (TNI). Hare ba akuzasaun ne’e Lere husu ba povu no grupo hotu iha nasuan ne’e la labele akuza malu hodi sukit tempu pasadu nian.
“Ita lalika akuza malu, uluk iha tempo funu kauze 90 % ema husi ai laran mai enterga an , ne’ebe diak liu ita lalika akuza malu tamba hau nia Vice ne’e mos ema nia iha dignidade,”Lere afirma.
Lere mos kestioan, nusa mak uluk Meno Paixao fofoun tama ba forsa iha Distritu Aileu la iha ema ida no grupo balun halo protesta. Mino sae ba Koronel mos laiha protestu no agora sae ba Brigadeiru komesa mosu protestu. Hahalok ne’e halo Lere la simu.
Tamba ne’e, General fitun rua ne’e husu ba povo tomak, sidadaun timor ona lalika akuja malu, la bele tu liman ba malu. Presiza hare saida mak agora dadaun lao ona ne’e.
“Ita atu dezenvolve rai ne’e laos hatudu liman ba malu maibe ita tenke serbisu hamutuk,” Lere apela.
Discussion about this post