Dili–29 juñu 2023 – UN WOMEN no Fundasaun Media Development Centre (FMDC) Kontinua Hakat hodi Proteje Feto no Labarik Feto Liuhusi Media hodi fasilita formasaun kona ba Reportajen Sensivel Ba Jornalista no Futuru Journalista sira husi estudante Comunicação Social.
Média sai hanesan autor ne’ebé influénsia lalais liu iha sosiedade liuhusi informasaun ne’ebé jornalista sira fahe, iha realidade média barak fó sai informasaun kona ba violénsia bazeia ba jéneru halo feto sai vulneravel ba dala rua, ho nune’e atu proteje feto vuneravel hirak ne’e FMDC kontinua kapasita jornalista ativu sira atu halo reportajen ne’ebé sensivel ba jéneru.
Tuir estudante Departamentu Comunicação Social Universidade Nasional Timor lorosa’e (UNTL), Liliana Freitas Soares hateten iha formasaun ne’e nia orgullu tebes tamba aprende liu kona ba igualidade jéneru no nia hakarak tebes atu aplika iha sosiedade nia leet liuliu iha nia munisipiu rasik tamba iha munisipiu sosiedade sei fiar makas ba iha mitus katak, servisu uma laran ne’e feto mak halo de’it no mane labele halo no nia mós hanesan estudante komunikasaun sosiál nia mós aprende konaba oinsa mak atu halo reportajen sensível bazeia ba igualidade jéneru ba públiku.
Liliana Freitas Soares, Estudante Comunicação Sosiál UNTL
“Nu’udar estudante no joven ha’u apresia tebes tamba primeira vez ha’u tuir formasaun ne’e, ha’u aprende materia barak iha treinamentu kona ba reportajen sensivel bazeia ba igualidade jéneru liliu kona ba mitus no faktus tamba dala ruma mane balun la fó oprtunidade ba feto atu asesu ba edukasaun nebe bot no sosiedade liliu inan-aman fo kbiit liu ba mane iha uma laran halo mane sente forsa hodi halo violénsia tuir nia hakrak, no ha’u mós hakarak aplika iha hau nia komunidade no familia sira tuir materia ne’ebé ha’u aprende ona, no ba futuru ha’u sai jornalista ha’u sei hakerek notisia ne’ebé sensível liga ho kazu hirak ne’ebé akontese ba feto maluk sira hodi fo sai no eduka publiku husi hau nia reportajen,” Hateten Liliana iha salun FMDC ohin.
Iha fatin hanesan jornalista Radio Loriku Lian, Vasculino Martins Araujo dehan liga ho formasaun loron tolu ona ne’ebé nia tuir nia orgullu tebes tamba nia mós aprende liafuan foun husi formador sira no nia aprende espefiku materia ne mak oinsa atu hakerek notisia ne’ebé sensível hodi publika ba públiku.
“Ha’u hanesan jornalista ida primeira vez ha’u tuir formasaun ne’e loke tebes ha’u nia hanoin tamba ha’u hakarak atu aplika iha sosiedade sira tamba dalabarak komunidade sira lahatene no sira konsidera violénsia bazeia ba jéneru ne’e hanesan violénsia uma laran no komunidade sira konsidera feto hanesan servidor de’it ba mane nia familia ka servisu iha dapur de’it, maibé ida ne’e laos, ne’e hanesan violénsia públiku, tamba ne’e mak ha’u tuir ona formasaun ne’e ha’u hakarak atu aplika no tau iha pratika liu husi notisia ne’ebé mak ha’u hakerek no fó sai ba publiku” dehan Vasco.
Tuir formador João da Silva Sarmento hateten nia ajuda ekipa hodi fo formasaun iha semana ida ne’e ho materia Reportajen Sensível Bazeia ba Jéneru iha loron primeiru ita foku liu ba teoria kona ba saida mak mitus no faktus, dezenvolve ita nia persepsaun kona ba violensia bazeia ba jeneru no halo analiza ba textu ka notisia sira, iha loron tuir mai sira sei tun iha terenu hodi prartika hakerek notisia ne’ebé mak sensivel ba jéneru no sira mós sei hakerek istoria kona ba feto potensial sira.
João da Silva Sarmento | Formador
“Formasaun kona ba repertajen sensivel jéneru ne’e importante tebes ba jornalista no kandidatu jornalista sira oinsa hasae sensibilizasaun hodi bele halo kobertura ne’ebé sensivel ba jéneru, no iha futuru ita hakarak ita nia sosiedade luta ba igualidade jéneru no sosiedade ne’ebé mais pacífica iha TL, no iha formasaun ne’e partisipante sira hatudu entuaziamu atu aprende diak loos, tamba ne’e ami mós fo oportunidade ba sira atu tun direta ba iha terenu hodi halo kobertura liga ho materia ne’ebé mak sira aprende durante iha loron lima,” informa João
Enkuantu treinamentu ne’e hetan fundus husi KOICA TL no suporta husi UNWOMEN liuhusi projetu “Hamutuk ba Igualdade” no formasaun ne’e ba dalatolu, halao durante loron 5 hahu husi loron 27 fulan Junho to’o loron 1 fulan Julhu, partisipante hamutuk 37 maioria husi estudante Comunicação Social husi UNTL no UNITAL inklui Jornalista ativu sira husi Media Imprime, Online no Eletroniku no Jornalista husi Radio Komunidade sira. Iha formasaun ne’e mós iha faselitador/a nain tolu mak Matilde Coelho da Silva hanesan konsultan ba FMDC no formadora seluk mak Desi Reis.
Jornalista: Natalia de Araújo
Editor: Jonas
Discussion about this post