Díli 18/07/2024, Fundasaun Azía liu husi Programa Nabilan kolabora ho Ministériu Solidaridade Sosiál no Inkluzaun (MSSI), lansa Padraun Prosedimentu Operasionais (PPO) kona-ba Jestaun kazu labarik koordenasaun hodi suporta vitima Violénsia bazeia ba jéneru no entrega ekipamentus ICT no distribui sertifikadu ba formados sira tuir ona formasaun kona-ba violénsia bazeia ba jéneiru.
Tuir reprezentante Fundasaun Ázia Héctor Salazar Salame hatete iha nia diskursu, Fundasaun Ázia liu husi programa Nabilan orgullu tebes bele servisu hamutuk ho MSSI hodi kontinua fó apoiu no haforsa asistensia ba feto no labarik sira ne’ebé mak esperiénsia violénsia.
“Prinsipiu servisu atendimentu ba vítima, etapa jestaun kazu liu-liu iha mekanizmu koordenasaun iha padraun ne’e kursiál tebes ba fornesedor servisu sosiáis no membru rede referal sira no mós fornese asistensia ba vítima sira ho dignu, inkluzivu liu tan, TAF espera padraun ne’e laos sai hanesan dukumentu de’it maibé sai padraun ida ne’ebé moris no guia ita hotu atu servisu ho di’ak” dehan Héctor iha diskursu ba jornalista sira iha Novo Turizmu.
Iha fatin hanesan reprezentante UNICEF iha Timor-Leste Patrizia Di Glovani hatete katak ohin loron lansa Padraun Prosedimentu Operasionais (PPO), importante rua ne’e foka ba jestaun kazu protesaun labarik, joven ba tipu víolensia hotu inklui víolensia bazeia ba jéneru iha ámbitu regular no emerjénsia no autor protesaun labarik atu fornese jestaun kazu ne’ebé efetivo, apropriadu ba labarik no joven.
“UNICEF, ho apoiu husi doador dezenvolvementu sira hanesan Governu Austrália no USAID, durante ne’e fó apoiu ba Governu iha dezenvolimentu PPO ba jestaun kazu ba labarik no joven no ami sei kontinua fó apoiu ba iha nia implementasaun” dehan Patrizia.
Tuir Ministra MSSI Verónica das Dores, hatete katak iha lansamentu ohin loron iha parte rua ida mak lansamentu protesaun labarik, ida seluk mak víolensia bazeia ba jéneru.
“Tanba Sistema ne’e sai dijital ema mós lahatene se mak iha kaju ne’e tanba dalabarak ita hare katak ita nia vítima sira ita tenki proteje sira iha fatin ne’ebe seguru para halo ema seluk labele hatene no iha parte balun konaba vítima sira ha’u labele fo sai iha mídia no ita espera sei la husik labarik ida iha kotuk no trata vítima sira hanesan iha parte hotu” dehan Verónica.
Iha serimonia lansamentu ne’e hetan apoiu orsamentu husi Governu Áustralia, no UNICEF entrega laptop 36 no printer rua ba MSSI hodi harii kapasidade fisiakal protesaun labarik iha pontu fokal VBJ no departamentu protesaun labarik atu utiliza primeiru teknolojia avansadu sistema jestaun kaju dijital ne’ebe mak adopta iha tinan ida ne’e tanba Timor-leste nu’udar nasaun ba 59 globalmente ba dala 6 iha rejiaun Asean ne’ebé uja primeiru no distribui sertifikadu ba formadus sira kona-ba VBJ iha munisipiu 13.
Jornalista : Natalina Araújo
Discussion about this post