Prezidente Repúblika José Ramos Horta husu governu atu iha politíka di’ak ba orsamentu jeral estadu 2024 investe ba kombate ma-nutrisaun liu husi programa edukasaun alimentasaun nutrisaun ba bebe no inan isin rua no adultu sira atu hakmatek iha Timor-Leste.
“Dezisaun bo’ot iha parlamentu Nasional kona-ba orsamentu jeral estadu oportunidade bo’ot ba nono governu atu lansa hahú iha 2024 ho politíka ne’ebé ita bele hatete di’ak teb-tebes nivél mundiál para kombate ma-nutrisaun krónika ba bebe ho idade loron ida to’o tinan 2 no 3 ne’ebé kritik tebtebes” dehan prezidente repúblika José Ramos Horta iha serimómia lansamentu Inter-Ministerial Task Force on Sosial Affairs ne’ebé lansa husi Banku Mundiál iha City8 Manleuna, (14/11/2023).
Horta dehan, se governu la tau matan ba labarik sira ne’e wainhira labarik sira bo’ot sei sai defisiénsia intelektuál, ne’e duni tenki tau matan wainhira inan isin rua liu husi programa nutrisaun, saúde, médiku no parteira sira.
“Seguransa alimentar ne’e númeru 1 tanba ne’e ita nia moris, labarik sira nia moris, kosok oan sira no inan sira nia moris, seguransa Alimentar, nutrisaun, saúde, bee moos buat sira ne’e hotu portantu iha nono governu nia liman, tanba setór intersektoral ne’e importante teb-tebes tenki tau orsamentu loloos” nia akresenta.
Iha fatin hanesan Vise Primeiru Ministru no Ministru Koordenador Asuntu Sosiais no Ministru Dezenvolvimentu Rurál no Abitasaun komunitária Mariano Assanami Sabino hatete, tenpu ona ita tenki sinkroniza no armoniza programa planu sira ita tenki rona asaun sira ne’ebé ké integradu, vizaun ida programa ida asaun sira mak diferente iha ida-idak nia exekusaun.
“Ita presiza ina koordena para halo servisu ne’ebé labele duplikasaun integradu atu ita bele atinje objetivu, liuliu ba asuntu sosiál ne’ebé iha komponente tolu mak ohin ita koalia, ida mak mal-nutrisaun no ida mak labarik kosok oan sira no ba joven sira, tanba ne’e ita presiza ona koordenasaun digitaliza ba informasaun hodi nune’e para ita hatene ita nia dadus lolos” dehan Assanami.
Diretor Rejional Banku Mundial ba Dezenvolvimentu Umanu iha Rejiaun Azia no Pasifiku, Alberto Rodriguez, iha nia diskursu hatete Lansamentu Inter-Primeiru Taskforce ba Asuntu Sosial ohin hatudu kompromisu kle’an husi Governu atu harii sosiedade ida-ne’ebé la husik ema ida no investe liu-liu iha nia grupu frajil sira no membru vulneravel sira husi idade sedu.
“Natureza Inter-Ministerial husi Taskforce ne’e importante tebes, nia área prioridade dezenvolvimentu sedu ba labarik, nutrisaun no seguransa ai-han, no empoderamentu ba foin-sa’e sira, hasoru dezafiu cross-setorial ne’ebé presiza solusaun ida-ne’ebé hanesan liu husi aprosimasaun koordenada entre Ministeriu sira. No dezenvolvimentu planu asaun estratéjiku konjunta sei permite Governu, ho apoiu husi Parseiru Dezenvolvimentu sira, atu halo sinerjia no forsa ne’ebé fahe ba malu, no mós atu asegura katak rekursu sira ne’ebé disponivel ho objetivu atu hetan impaktu másimu”
Tuir dadus ne’ebé asesu husi Banku Mundiál Timor-Leste, agora Timor-Leste iha previlejiu aas liu ba raes badak iha labarik (fulan 0-59) ma-nutrisaun aas liu atinje 47% entre nasaun 20 iha mundu.
Iha serimonia lansamentu Task Force on Sosial Affairs partisipa husi Membru governu, ONG Nasionál inklui Ajénsia internasionál no parseiru dezenvolvimentu sira.
Jornalista : Jonas
Editora : Eva Flor
Discussion about this post