Dili – Atu asegura no proteje Joventude iha mídia dijitál hodi labele hetan abuzu husi média online, ohin The Asia Foundation no Oxfam T-L lansa Relatoriu Joven Dijital iha Timor-Leste.
Tuir Jerente Asuntu Influénsia advokasia OXFAM Timor-Leste Adilson da Costa hateten durante halo peskiza konaba joventude dijitál iha Timor-Leste, Oxfam servisu hamutuk ho Fundasaun Asia hodi buka hatene konaba joven sira iha era dijitál ne’ebé utiliza média sosiál hanesan plataforma ida ne’ebé sira utiliza ba area komunikasaun no hare utilizasaun média sosiál ka plataforma dijitál no mós joven sira atu uja média sosial ho seguru.
“Liu husi peskiza ida ne’e Ami mós esplora pontensia joven dijitál sira ne’ebé utilza média sosiál hodi halo komunikasaun no halo influénsia iha sira nia area servisu ka sira nia atividade rasik no mós oinsá atu bele aprende liu husi problema sira ne’ebé dala barak akontese, bainhra joven sira utiliza média sosiál ka uja plataforma dijitál la seguru ka hetan ameasa hodi bele komprende maneira sra di’ak liu atu bele responde ba problema ne’ebe joven sira hasoru iha média sosiál” nia dehan ba Jornalista sira hafoin lansa Relatóriu Joven Dijitál iha Timor-Leste.
Entertanto Secretario Estado Comunicação Social (SECOMS) Mericio Juvinal Akara iha nia diskursu hateten liu husi peskiza ne’ebé OXFAM hala’o hatudu ona hanessan evidensia ida para atu hadia hodi dezenvolve joven sira iha area dijitál hodi utiliza média ne’ebé klaru no labele hetan bebeik abuzu ba online, ho ida ne’e Governu mós iha responsabilidade bo’ot hodi hare kona ba média plataforma ne’ebé ohin loron ema hotu-hotu asesu.
“Hakarak fó hela mensajen ba joventude sira hotu katak ita boot sira iha direitu atu bele asesu ba média sosiál maibé asesu ho informasaun ne’ebé digno no responsabilidade labele julga ema seluk iha média sosiál no uja konportamentu ne’ebé di’ak iha joven ida-idak nia aplikasaun média” dehan Mericio, iha Timor Plaza, (29/09/2022).
Iha fatin hanesan Embaixador Nova Zelandia iha Timor-Leste Philip Hewitt hateten, lansamentu media dijital ne’e hanesan forma ida husi governu Nova zelandia hodi servisu hamutuk ho Fundasaun Asia liuhusi Programa Seguransa Komunidade, no nia mos apresia ba Governu Timor-Leste ne’ebé tau prioridade as ba joven sira atu asegura média sosial.
“Ita hotu hakarak asegura joven sira nia liberdade espresaun no online, no juventude sira hatene sira nia an wainhira online, no sira mos iha konsiensia bot husi hahalok online hatudu pozitivu, no buka atu sai ezemplu diak, sira mos hatudu komprensaun oinsa atu proteje husi risku iha online, hases an husi informasaun bosok. No ami hakarak joven sira nia lian no esperiensia bele rona”.
Lansamentu Relatóriu ne’e husi Oxfam Timor-Leste, The Asia Foundatio, no New Zealand Foreign Affairs & Trade, hetan partispa husi Presidente Konsellu Imprensa, PNTL, Joven, Universitriu no Organizasaun Ema ho Difisiensia sira.
Jornalista : Nazia
Editora : Eva Florentina
Discussion about this post