KNDL Husu Prevene Violensia Hasoru Labarik Durante Kampanha Parpol

Radio, online – Diretora Komisaun Nasional Direitus Labarik (KNDL) Adalgiza Magno husu ba kandidatu Prezidensial nomos Partido Politiku (Parpol) sira durante iha kampanha politika evita violensia hasoru ba labarik sira.

Informasaun ne’e Diretora hato’o liu husi konferensia da emprensa hamutuk ho Diretor STAE Thomas Cabral iha Kaikolo, Kinta (2/2).

Diretora KNDL ne’e hatutan, tuir konstituisaun RDTL no tratadu sira kona ba direitus labarik nian koalia kona ba papel familia komunidade no estadu atu halo protesaun, dezenvolvimentu no promove partisipasaun labarik iha sosiedade.

Ho razaun ne’e iha eleisaun geral KNDL hamutuk ho STAE husu ba kandidatura no parpol hodi prevene risku violensia hasoru labarik durante kampanaha partidu politik “Ambiente Seguru Ba Labarik”.

Antes ne’e mos KNDL  hamutuk ho parseiru lubuk ida ne’ebe servisu ba direitu no  protesaun ba labarik husi NGO nasional no UNICEF  atu  hato’o ami nia preokupasaun kona ba festa demokrrasia bo’ot ne’ebe sei akontese iha ita nia rai tinan ida ne’e.

Ho preokupasaun hirak ne’e KNDL husu ba komponente hotu ne’ebe involve-an iha festa ne’e  favor ida atu tau matan ba labarik sira. “

“Ita lakoi atu akontese iha tinan kotuk 2007  iha labarik sira mak sai vitima tamba ne’e aproveita biban ida ne’e ami hakarak mai fo hanoin fila fali ita respeita labarik sira  labele involve an iha festa demokrasia tamba ida ne’e sira gasta sira nia tempu,”Adalgiza komenta.

Iha fatin hanesan Director STAE, Thomas Cabral ba jornalista, inkontro ida ne’e importante tebes tamba komisaun ba protesaun ba labarik ho ita nia estadu foin hahu no ita hotu hatene elisoen ne’e buat politik  ne’ebe hanesan dezenvolvimentu  demokrasia atu hari’i estado foun ida.

“Ita atu hari estadu  foun   ita hari’i ho estadu ida ne’ebe ho kualidade,ital abele hari’I estadu ida ho labarik ida mak barak liu,”Thomas akresenta.

Katak nia, estadu iha  obrigasaun tenki informa ba ita nia komunidade sira katak, labarik  sira  la bele involve an iha aktus politik ,sira ne’ebe idada sidauk to’o labele lori ba iha aktus politik maibe   la barik tenki  involve  eskola no  ba eskola para matenek bele truka ita.