Radio, online – 10 Nov 2011. Iha loron ikus nian ba festival kail ikan Com 2011, hala’o iha ambiente ne’ebe kompetetivu tebes.. Iha kategòria tolu ne’ebe hala’o iha festival ne’e, mak hanesan; kategòria ikan bo’ot liu, torneiu internasional, no toreniu lokal, akontese separasaun ne’ebe oituan deit entre manan na’in sira iha permeiru, segundu, no terseiru lugar.
Informasaun ne’e radioliberdadedili.com asesu liu husi via emali husi Gabinete informasaun Prezidente da Republika Segunda, (14/11).
Iha loron dala-hat nian ba eventu ne’e, Bayu Noer Rachman, membru husi ekipa ‘Mancing Mania’ konsege kaer ikan tipu Trevally’s ne’ebe bo’ot tebes atu nune’e Rahman konsege hetan valor bo’ot iha kompetisaun ne’e. Maibe ida ne’e la konsege halo Rahman sai nu’udar anan na’in ba kompetisaun loron hat nian tamba ikus mai, partisipantes lokal, Joao Jose Fernandez ne’ebe kompete iha kategòria torneiu internasional, konsege sai manan na’in iha eventu refere.
Iha komunikadu ne’e hateten, rezultadu ikus ba torneiu internasional nian mak hanesan tuir mai ne’e; Joao Jose Fernandez husi Timor-Leste ho valòr 2352, Bayu Noer Rachman husi Indonesia ho valòr 1794, no Steve Starling husi Australia ho valòr 1775.
Molok ne’e, iha loron ba dala-tolu kompetisaun ne’e nian, Vasco Suarez konsege kaer ikan tipu wahoo ida ho medidas 135 cm. Ikus mai, ikan refere sai nudar ikan ne’ebe di’ak liu tantu iha kategòria lokal no torneiu Internasional.
Iha kategòria torneiu lokal nian, Mateus Rodriguez sai nudar permeiru lugar. Mateus ne’ebe hela iha suku Com ne’e hateten “Ne’e hanesan onra bo’ot ida hodi sai manan na’in”. Mateus domina eventu ne’e ho valòr total 4994 (signifika katak Mateus konsege atinji valór liu husi rihun ida kada loron), hodi nune’e nia konsege manan osan ho valòr total $3.000 Dolares Amerikanu.. Tuir mai, Deoniza Viegas no Anselmo Fernandez Xavier sai nudar segundu no terseiru lugar ho valòr 4615 no 3176.
Diretòr eventu ne’e nian, Sean Ferguson-Borrell, hateten, “Festival kail ikan iha Com 2011 ne’e la’o ho susesu tebes, ita hatudu ona oinsa setòr turismu mariña nian iha Timor-Leste mos iha potensia ne’ebe di’ak tebes. Eventu ne’e mos iha impaktu pozitivu hodi hadi’a ekonomia komunidade lokal iha Com no ita konsege lori partisipantes sira husi nasaun barak.
Partisipantes hirak ne’e iha interese atu Timor-Leste sai nudar sira nia destinasaun turismu nian. Timor-Leste nasaun ida ne’ebe nakonu ho natureza ne’ebe natural, natureza ida ne’ebe furak tebes, ne’ebe ema barak seidauk eksplora-ba, no fatin ida ne’ebe furak hodi deskansa nian”.
Discussion about this post